Այս տարվա հունվար-սեպտեմբերի ամիսների մակրոտնտեսական ցուցանիշներն իրենց մեջ չեն ներառում կամ շատ քիչ մասով են ներառել պատերազմական գործողությունները: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արտակ Մանուկյանը:
«Այս ցուցանիշները դիտարկելիս տեսնում ենք, որ որոշակի դրական դինամիկ կար մասնավորապես շինարարության մասով, որի վերաբերյալ մշտապես խոսվում էր, որ կապիտալ շինարարության ծրագրերի մասով որոշակի դանդաղում կար: Նաև արդյունաբերական արտադրանքի որոշակի աճ կա, բայց նորից նշենք՝ չկտրվելով իրականությունից, որ սա առաջին 9 ամսվա տվյալներն են, որտեղ 6,6 տոկոս տնտեսական անկում կա: Այս անկումը առավելապես պայմանավորված էր կորոնավիրուսով: Հետագա ամիսներին տնտեսական տարվա վրա ազդեցություն է ունենալու նաև պատերազմական իրավիճակով պայմանավորված գերակայությունների փոփոխությունները: Դրանով պայմանավորված կարծում եմ, որ մենք տարին, եթե բյուջեով խոսում էինք 6,8 տոկոս անկման մասին, ապա կարծում եմ, որ տարին ամենայն հավանականությամբ կփակենք 7 տոկոսին մոտ անկմամբ»,-ասաց նա: