«Այս պահի դրությամբ քաղաքական հարցերի մասին խոսելը վաղաժամ է։ Հիմնական շեշտը պետք է դնենք պատերազմի դադարեցման վրա»,- «Առաջին լրատվական»-ի հետ զրույցում նման տեսակետ հայտնեց Արցախի նախագահ Արայիկ Հարությունյանի՝ արտաքին հարաբերությունների գծով խորհրդական Դավիթ Բաբայանը։
Մեր զրուցակիցն ընդգծեց՝ երբ պատերազմական գործողությունները դադարեն, այդժամ կարող ենք անդրադառնալ քաղաքական հարցերին: «Այս պահի դրությամբ կարևորագույն հրամայականը պատերազմական գործողությունների դադարեցումն է, հետո նոր կանդրադառնանք մնացած քաղաքական խնդիրներին։ Պետք է կանգնեցնենք պատերազմը, հետո նոր խոսենք ու տեսնենք, թե ինչ մոտեցումներ կան։ Բայց իմ խորին համոզմամբ՝ պետք է վերջնականապես կարգավորել խնդիրը, որպեսզի հետագայում չլինեն արյունալի բախումներ։ Պետք է ձգտենք դրան։ Այս պատերազմը ցույց տվեց, որ պետք է հիմնովին կարգավորել խնդիրը, ու որևէ հարց չթողնել ապագայի համար։ Եթե դա ստացվի՝ կլինի գերազանց։ Ամենակարևորը Արցախի, Շուշիի պաշտպանությունն է, մեր ժողովրդի անվտանգության ապահովությունը։ Մնացած հարցերը հետո կքննարկենք»,- ասաց Բաբայանը՝ անդրադառնալով ՌԴ նախագահ Վլադիմիր Պուտինի վերջին հայտարարություններին, որի համաձայն՝ Ադրբեջանին պետք է նախ հինգ, ապա երկու շրջան վերադարձնել։
Խոսելով Մինսկի խմբի ձևաչափը փոխելու Իրանի ու Թուրքիայի ակտիվ քաղաքականության մասին՝ Դավիթ Բաբայանն ասաց. «Թուրքիայի անդամակցությունն իհարկե վտանգ է։ Եվ նա չի էլ թաքցնում, որ մեր թշնամին է։ Ադրբեջանն ու Թուրքիան երբեք չեն թաքցրել իրենց վերաբերմունքը։ ԵԱՀԿ Մինսկի խմբի ձևաչափն այնքան էլ հեշտ չէ փոխել։ Վաղը չի կարող որոշվել, որ նոր երկրներ մտնեն այդ ձևաչափի մեջ, քաղաքական ու տեխնիկական լուրջ խնդիրներ կան։ Բացի այդ՝ համանախագահող երկրները չեն ուզում փոխել ձևաչափը։ Միգուցե ԵԱՀԿ Մինսկի խմբի համանախագահների հետ զուգահեռ այլ ձևաչափեր էլ լինեն։ Երբ կարգավորվի հակամարտությունը, միգուցե նրանք լինեն խաղաղության ու անվտանգության ապահովողներ, բայց դա ցույց կտա ժամանակը»։
Անդրադառնալով Շուշիում այս պահին տիրող իրավիճակին՝ մեր զրուցակիցն ասաց. «Երեկ երեկոյան թշնամին փորձել է հզոր հենակետ ձևավորել, որպեսզի Շուշիի վրա հարձակում գործի։ Նրանք մի վայր են տեղափոխել մեծ քանակությամբ զինտեխնիկա, հրետանային, հրթիռային համակարգեր ու բազմաթիվ կենդանի ուժ։ Մեր հրետանին, մեր տղաներն ու աշխարհազորը ոչնչացրել են։ Նրանք բազմաթիվ զոհեր ունեն, գրեթե ողջ զինտեխնիկան ոչնչացվել է։ Այսինքն՝ կարելի է ասել, որ առաջին գրոհը էֆեկտիվորեն հետ է մղվել, թշնամին բազմաթիվ զոհեր կրելով հետ է շպրտվել։ Չպետք է սրանով բավարարվենք, թշնամին կարող է փորձել երկրորդ ու երրորդ գրոհները։ Պետք է կանգնենք մինչև վերջ»։