ՀՀ Արտաքին գործերի նախարարությունը վերահաստատում է այն սկզբունքային դիրքորոշումը, որ Արցախի բնակչության գոյությունը հնարավոր չէ Ադրբեջանի իրավասության ներքո: Այս մասին հոկտեմբերի 29-ին հրավիրված մամուլի ասուլիսի ընթացքում ասաց ԱԳՆ մամուլի խոսնակ Աննա Նաղդալյանը:
«Ադրբեջանի նախագահի հայտարարություններն ու Ադրբեջանի զինված ուժերի գործողությունները, որոնց մենք ականատես ենք լինում, ցույց են տալիս, որ Ադրբեջանի նպատակն է հայաթափել Արցախը, բնաջնջել Արցախի բնիկ ժողովրդին և Ադրբեջանն Արցախը ցանկանում է առանց այդ բնիկ ժողովրդի:
Արցախի բնակչության գոյությունը հնարավոր չէ Ադրբեջանի իրավասության ներքո: Արցախի դեմ լայնամասշտաբ ագրեսիայի առաջին օրվանից Ադրբեջանի գործողություններն ուղեկցվել են պատերազմական կանոնների և միջազգային մարդասիրական իրավունքի կոպիտ խախտումներով, որոնք առավել քան խոսուն են»,- ասաց Նաղդալյանը:
Նաղդալյանը հավելեց, որ այդ պատերազմական հանցագործություններից է կասետային ռումբերի կիրառումն Արցախի խաղաղ բնակչության դեմ:
Արցախի դեմ սեպտեմբերի 27-ից Ադրբեջանի` Թուրքիայի և վարձկան–ահաբեկիչների աջակցությամբ սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ–ի միջնորդությամբ հայտարարվել է հրադադարի մասին, սակայն Ադրբեջանը ուժի մեջ մտնելուց րոպեներ անց խախտել է դրանք, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։
