Հայաստանի և Ադրբեջանի արտգործնախարարների, ինչպես նաև Մինսկի խմբի համանախագահների համատեղ հանդիպումը, որը պետք է կայանար այսօր, հետաձգվել է: «Առաջին լրատվական»-ի հետ զրույցում, անդրադառնալով այս դիտարկմանը, ԱԺ «Իմ քայլը» խմբակցության պատգամավոր Վահագն Թևոսյանը նշեց, որ այդ հանդիպումը արդեն իսկ կարելի է համարել անարդյունավետ:«Վերջին շրջանում Ադրբեջանի ոչ ադեկվատ դիվանագիտական վարքագծով պայմանավորված՝ չեմ կարծում, թե կարելի է որևէ արդյունավետ ելք ակնկալել»,- նշեց պատգամավորը:
Հայաստան-Ֆրանսիա Առևտրաարդյունաբերական պալատի նախագահ Արուսյակ Հայրապետյանի դիտարկմամբ՝ ակնհայտ է, որ դիվանագիտական ջաքերն սպառվում են: «Աշխարհաքաղաքական մեծ փոփոխություններ և վերադասավորումներ են տեղի ունենում: Արցախի պատերազմը կիզակետում է, բայց սա շատ ավելի մեծ, գլոբալ աշխարհաքաղաքական վերափոխում է տեղի ունենում, նախկին կառույցները փլվում են, նորերը պետք է ձևավորվեն»:
Հարցին՝ դերակատարներն ավելի շատ պատերազմով են անհանգստացած, թե ահաբեկիչների խնդրով, քաղհասարակության ոլորտի փորձագետ Միքայել Հովհաննիսյանը պատասխանեց. «Աշխարհի մամուլում տարբեր տեղեկություններ հրապարակվեցին Արցախյան պատերզամում Ադրբեջանի կողմից ջիհադականների և վարձկանների ներգրավվածության մասին: Խոսքն այն մասին չէ, թե ապացույցներ չկան, այլ այն մասին է, որ այդ ապացույցները ներկայացնում են ըստ անհրաժեշտության և աստիճանաբար: Պատերազմի առաջին օրերին թե՛ ռուսական, թե՛ ֆրանսիական և թե՛ ամերիկյան կողմից հայտարարություններ եղան, որ հավաստի տեղեկություններ ունեն ահաբեկիչների ներգրավվածության վերաբերյալ… Այսօր Պուտինը հայտարարեց, որ համատեղ ջանքեր պետք է գործադրել միջազգային ահաբեկչության դեմ պայքարելու համար, տեսանք՝ Ֆրանսիայում ինչ է կատարվում, պատահականություններ լինել չեն կարող: Ահաբեկչական խմբավորումները վտանգ են ոչ միայն Արցախի և մեր տարածաշրջանի, այլ նաև ամբողջ աշխարհի համար»:
Քննարկման մասնակիցների դիտարկմամբ՝ ահաբեկչությունը 21-րդ դարի պատերազմների զենք է, որը Թուրքիան լայնորեն կիրառում է:
«Եվ այս իրավիճակում մեր խնդիրն է պահպանել այն, ինչ ունենք, որպեսզի չկրկնվի «թղթե շերեփի» պատմությունը»,- ընդգծեց Վահագն Թևոսյանը:
Մանրամասն՝ տեսանյութում:
