«Առաջին լրատվական»-ի զրուցակիցն է ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը։
– Ֆրանսիայի խորհրդարանի պատգամավորների պատվիրակություն էր այս օրերին այցելել Արցախ, որոնք հանդիպել են Արցախի ԱԺ պատգամավորների խոսնակի հետ, այցելել են վիրավոր զինծառայողներին: Նրանք նաև ներկայացրել են Արցախի ճանաչման բանաձևը, որի նախաձեռնողն իրենք են: Ինչպե՞ս եք գնահատում նրանց այցը Արցախ, ի՞նչ է սա փոխում ընդհանուր առմամբ:
– Երբ որ նրանք վերադարձան Ֆրանսիան, կապվեցին ինձ հետ և ասացին՝ չեք պատկերացնի, բայց ձեր բոլոր ասածները ճիշտ են: Այսինքն՝ երբ իրենք այցելեցին Երևան, Գորիս, եղան հիվանդանոցներում, իրենց աչքով տեսան վիրավորված երիտասարդներին, հանդիպեցին Արցախից Հայաստան եկած ընտանիքներին, երբ Գորիսում եղած ժամանակ լսեցին Արցախի եկող ռմբակոծությունների ու հրթիռակոծությունների ձայները, այդ ամենից հետո ինձ ասացին՝ մենք չէինք կարող երևակայել, թե ինչքան դժվար է այս պատերազմական վիճակը: Ասացին, որ Ֆրանսիա վերադառնալուն պես իրենք կլինեն Հայաստանի ու Արցախի ժողովրդի առաջին պաշտպանները, և բոլոր կուսակցությունների մեջ ձեր դեսպաններն ենք լինելու: Սա, իհարկե, շատ լավ է, որովհետև հիմա մենք այլևս կարիք չունենք միջնորդավորված իրենց ներկայացնելու իրականությունը, պատմություններ պատմելու: Սա մեզ համար շատ դրական երևույթ է, և այդ պատգամավորների հետագա գործունեությունը շատ օգտակար կլինի մեզ համար:
– Վերջին օրերին հայերի կողմից եվրոպական, այդ թվում՝ ֆրանսիական քաղաքներում բազմաթիվ ակցիաներ են կազմակերպվում, որոնք, սակայն, ցավոք, առանց միջադեպերի չեն անցնում: Մասնավորապես, Վալանսի մոտ թուրքերը մուրճերով հարձակվել էին հայ ցուցարարների վրա, գիշերն էլ Լիոնում, Վիենում 150 հոգանոց թուրքերի ամբոխը դուրս էր եկել և փնտրում էր հայերի՝ հաշվեհարդար տեսնելու համար: Ինչպիսի՞ն է իրավիճակը հիմա, ակցիա իրականացնելն արդեն սկսում է վտանգավո՞ր դառնալ:
– Մթնոլորտը շատ վտանգավոր է: Մենք ժողովրդավարական ձևով ակցիաներ ենք կազմակերպում Ֆրանսիայում՝ հարգելով բոլորին: Մենք ցույցեր ենք կազմակերպում պատերազմի դեմ, խաղաղության համար, Արցախի անկախության համար, մեր ցույցներին հրավիրում ենք պատգամավորների, քաղաքական գործիչների, մտավորականների, լրագրողների, որոնք կարող են զորավիգ լինել մեր դատին, իսկ մյուս կողմը վայրենի ձևով, «Գորշ գայլերի» կազմակերպված խմբերը Էրդողանի կողմից, Ֆրանսիայում Թուրքիայի դեսպանի կողմից հակահայկական ցույցեր են կազմակերպել Վիենում, Լիոնում: Նրանք փողոցներում գոռալով փնտրել են հայերի և սպառնալիքներ հնչեցրել, անգամ հարձակվել ոստիկանների վրա: Այսօր էլ Նիցցայում թուրքը դանակով հարձակվել է մարդկանց վրա և մի քանիսին սպանել: Այսինքն՝ այս պահին Ֆրանսիայում կա շատ վտանգավոր իրավիճակ հայերի դեմ, նաև Ֆրանսիայի դեմ: Մենք, անշուշտ, կապի մեջ ենք ներքին գործերի նախարարի հետ, որպեսզի հայկական հաստատությունների անվտանգությունը ապահովվի:
– Հաշվի առնելով այսօր Նիցցայում տեղի ունեցած ահաբեկչությունը, կարո՞ղ ենք արձանագրել, որ իսլամիստ ահաբեկիչներն արդեն լրջագույն վտանգ են ներկայացնում ժողովրդավարական երկրների համար:
– Անշուշտ, մթնոլորտը շատ վատն է, և մենք համոզված ենք, որ Թուրքիան ուղղակի դեր է խաղում այս ամենի մեջ: Էրդողանը և իր կառավարությունը ուզում են ինչ-որ ձևով պատասխանել Ֆրանսիային, որը ակնհայտորեն կանգնած է Հայաստանի և Արցախի կողքին: Երբ որ Ֆրանսիայի նախագահ Մակրոնը Էրդողանի հետ բացահայտ հակասության մեջ է, երբ որ Թուրքիայի նախագահը հրապարակավ վիրավորանք է հասցնում Մակրոնին, դրա հետևանքներն են այսօր տեղի ունենում Ֆրանսիայում: Այս համատեքստում, բոլորը տեսնում են, որ ԴԱԻՇ-ի ահաբեկիչները շատ հստակ ու սերտ առնչություններ ունեն Թուրքիայի հետ: Թուրքիան զինում և մարզում է ԴԱԻՇ-ի ահաբեկիչներին, Թուրքիան մեծ պատասխանատվություն ունի՝ կապված այսօր տեղի ունեցած ահաբեկչական ակցիաների հետ: Հիմա արդեն շատ-շատերն են տեսնում այդ բացահայտ կապը: Հիմա հասարակության մեջ գերիշխող է դառնում կարծիքը, որ Ֆրանսիայի կառավարությունը պետք է այս ամենի պատասխանը տա Թուրքիային:
