Արդեն ավելի քան մեկ ամիս է, ինչ Արցախն ու Հայաստանը գտնվում են պատերազմի մեջ թուրքադրբեջանական ագրեսիայի դեմ: Ցանկացած պատերազմ մեծ փորձություն է, որի ժամանակ բացահատվում է տվյալ ազգի ներուժը, մոբիլիզացիոն հնարավորությունները: Մանավանդ երկարատև պատերազմի ժամանակ այդ ամենը չափազանց կարևոր է, որովհետև զինվորի, բանակի գործողություններին զուգահեռ մարտնչում են նաև հասարակությունները: Եվ հաղթում են այն հասարակությունները, որոնք ավելի դիմացկուն են և ավելի կայուն: Այս թեմայի շուրջ «Առաջին լրատվական»-ը զրուցել է Երևանի պետական տիկնիկային թատրոնի գեղարվեստական ղեկավար Ռուբեն Բաբայանի հետ:
Նրա խոսքով՝ պատերազմը այն երևույթն է, որը բացահայտում է յուրաքանչյուրին. կա՛մ դիմադրում ես, կա՛մ հանձնվում ես: «Մեր հասարակության մեջ այս ընթացքում ավելի շատ հրաշալի գծեր են բացահայտվել, քան բացասական գծեր: Մեծամասնությունը քաջ գիտակցում է և փորձում է իրականացնել մեկ բան՝ ամուր լինել:
Մեր թատրոնից առաջնագիծ մեկնած երիտասարդներ կան, ինձ ծանոթ ուրիշ տղաներ էլ շատ կան առաջնագծում, և նրանք բոլորը մի բան են խնդրում՝ ամո՛ւր եղեք: Թիկունքը պետք է ամուր լինի: Սա իսկապես նաև հասարակությունների պատերազմ է, և կհաղթի նա, ով ավելի ամուր ու դիմացկուն է և իրապես իր բանակին թիկունք է կանգնում: Մեր հասարակության մեծամասնության մեջ այս գիտակցումը կա»,- նշեց Բաբայանը:
Մանրամասն՝ տեսանյութում: