Պուտինի հետ հեռախոսազրույցի առիթով Թուրքիայի նախագահ Էրդողանը հայտարարել է, թե առաջարկել է նրան լուծել արցախյան հարցը՝ ինքը հանդիպի Ալիևին, Պուտինը՝ Փաշինյանին, և սկզբունքորեն պայմանավորվեն լուծել հարցը: Ի տարբերություն Էրդողանի, Պուտինի խոսնակ Պեսկովը հայտարարել է, որ այդ հեռախոսազրույցի ընթացքում չի քննարկվել Թուրքիայի բանակցային ներգրավման հարց, այդ հարցը չի եղել օրակարգում: Էրդողանը մի բան է ասում, Պուտինն՝ այլ: Իսկ ահա այդ ֆոնին տեղի է ունենում Ստեփանակերտի քաղաքային հիվանդանոցի և ծննդատան ռմբակոծումն ավիացիայով: Այդ քայլը վկայում է երկու բանի մասին՝ թուրք-ադրբեջանա-ահաբեկչական խառնածինը կամ գտնվում է այնպիսի վիճակում, երբ փորձում է դիմել ավելի ու ավելի հանդուգն և ցինիկ շանտաժի, կամ արդեն ձեռնամուխ են լինում հուսահատ քայլերի, կանգ չառնելով անգամ աղաղակող, ուղղակի պատերազմի հանցագործության հավասար գործողությունների: Ընդ որում, տեղեկություններ են տարածվել, համենայնդեպս մինչ երեկո դեռևս պաշտոնապես չհաստատված, որ ավիահարվածները հասցվել են թուրքական F16-երի ներգրավումով: Սա կնշանակի, որ Ստեփանակերտին հասցված հարվածները այլ բան չեն, քան Պուտին-Էրդողան հեռախոսազրույցին հաջորդած թուրքական գործողություն, որը, թերևս, պայմանավորված է այդ հեռախոսազրույցի բովանդակությամբ: Հրապարակային հայտարարություններից դատելով՝ հնարավոր է եզրակացնել, որ Պուտինը մերժել է արցախյան հարցի լուծման այն առաջարկը, որի մասին խոսել էր «սուլթանական բարդույթների» կծիկը՝ Էրդողան ազգանունով: Դա էլ թերևս կատաղեցրել է Էրդողանին, որը թիրախավորել է Ստեփանակերտի հիվանդանոցը: Ի՞նչ խոսակցություն է տեղի ունեցել նրանց միջև, որն Էրդողանին փաստորեն մղել է պատերազմի նոր հանցագործության:
