Կեսօրից հետո Ստեփանակերտն ու Շուշին ենթարկվում են հակառակորդի հրթիռակոծությանը։ Ադրբեջանը թիրախավորել էր Ստեփանակերտի ծննդատունը, քաղաքացիական ենթակառուցվածքներ, հանրային և տնտեսական նշանակության օբյեկտներ, կան բազմաթիվ ավերվածություններ։
«Առաջին լրատվական»-ի նկարահանող խումբն այժմ գտնվում է Ստեփանակերտում։ «Այս պահին Ստեփանակերտում օդային տագնապ է։ Այսօր առավոտից Ստեփանակերտում հանգիստ չի եղել՝ պարբերաբար տեղի են ունեցել հրետակոծություններ, որոնք մենք փորձել ենք հնարավորինս նկարահանել։ Այս պահին էլ հրետակոծությունները շարունակվում են։ Երբ մենք Շուշիում էինք, տեղեկություն տարածվեց, որ հրթիռակոծել են Ստեփանակերտի ծննդատունը։ Մենք շտապեցինք Ստեփանակերտ, որ նկարահանումներ իրականացնենք ռմբակոծված ծննդատան տարածքում։ Ինչպես արդեն տեսել եք՝ այնտեղ մի ամբողջ մասնաշենք էր ոչնչացվել։ Ներսում նույնպես շատ ավերվածություններ կային, սակայն մեզ հավաստիացրեցին, որ անձնակազմից և հիվանդանոցում այդ պահին գտնվող մարդկանցից որևէ մեկը չի տուժել՝ շնորհիվ ժամանակին ու ճիշտ կազմակերպված աշխատանքների։ Հիվանդանոցի տնօրենը նույնպես ասաց, որ աշխատանքներն իրականացվում են պատշաճ ձևով, և իրենք պատրաստ են նման գործողություններին, որովհետև սա առաջին դեպքը չէ, որ ադրբեջանական կողմը թիրախավորում է քաղաքացիական ենթակառուցվածքներ ու իրականացնում հակամարդկային գործողություններ»,- Ստեփանակերտից օնլայն կապի միջոցով տեղեկացրեց «Առաջին լրատվական»-ի մեկնաբան Ժիրայր Ոսկանյանը։
Մանրամասները՝ տեսանյութում։
