Այսօր՝ հոկտեմբերի 28-ին, ԱԺ-ում արտահերթ նիստի ժամանակ «Իմ քայլը» խմբակցության պատգամավոր Գայանե Աբրահամյանը հայտարարեց, որ նոր է վերադարձել Արցախից. «Եվ Արցախում 10 օրերի ընթացքում շատ բան եմ տեսել՝ անասելի ոգեշնչող և մեռնելու չափ հիասթափեցնող և թևաթափ անող: Հերոսների անգնահատելի սխրանքներ, նվիրվածություն և դրա կողքին՝ դավաճանների ու դասալիքների հանձնվողական մթնոլորտ»:
Նրա խոսքով՝ այն, ինչ կերտվում է Արցախում, կերտվում է խրամատում, հայրենիքի վերասահմանման գործընթացն է և միակ բանաձևը, թե ինչու պետք է կռվել:
Նա մեջբերեց Վազգեն Սարգսյանի խոսքը. «Այս երկիրը բառերով սիրելու երկիր չէ… Այս երկրի մայրաքաղաքը սկսվում է խրամատից»:
«Կռվում են տղաներ, որոնք դեռ չեն հասցրել սիրահարվել, բայց կռվում են իրենց սիրելու և ապրելու իրավունքը ողջ աշխարհին ապացուցելու համար: Այլևս չպետք է լինի հարց՝ «ինչու»: «Ինչուները» հաղթելուց հետո կքննարկենք»,- հուզմունքով ընդգծեց Գայանե Աբրահամյանը և հավելեց, որ ինքը խոնարհվում է բոլոր մայրերի առաջ:
Մանրամասն՝ տեսանյութում: