Apple-ը կարծես թե արագացնում է իր սեփական որոնողական տեխնոլոգիայի վրա տարվող աշխատանքները, քանի որ ԱՄՆ արդարադատության նախարարությունը, որն այժմ դատի է տվել Google-ին, բնականաբար հետաքրքրվել է ՏՏ ոլորտի երկու հսկաների միջև համաձայնագրով, գրում է Financial Times-ը: Այս համաձայնագրով Google-ը տասնյակ միլիարդավոր դոլարներ է վճարում Apple-ի հիմնական արտադրանքի՝ iPhone-ի վրա իր լռելյայն որոնողական համակարգը տեղադրելու իրավունքի համար:
Apple-ը իր սեփական որոնողական համակարգը չունի: Որոնումներով նրա փոխարեն զբաղվում է Google-ը, որն արդեն մեկուկես տասնամյակ մեծ գումարներ է վճարում այն բանի համար, որ նրա որոնիչը հանդիսանում է լռելյայն որոնիչ Safari բրաուզերում, որը տեղադրված է Mac համակարգիչների, iPhone-ների և iPad-ների վրա: Իր արտադրանքի վրա որոնիչ տեղադրելու թույլտվության համար Google-ը վճարում է Apple-ին, ինչպես նշված է Արդարադատության նախարարության կողմից Google-ին ներկայացրած հայցադիմումում (տարեկան 8-ից 12 միլիարդ դոլար կամ մաքուր շահույթի մինչև 20%-ը): Համագործակցության մասշտաբի մասին խոսուն են հետևյալ թվերը՝ 2019-ին Google-ի որոնողական տրաֆիկի գրեթե կեսը եկել է Apple սարքերից: