Հոկտեմբերի 27-ին պաշտոնից հեռացվել է ԱԱԾ սահմանապահ ուժերի շտաբի պետը: Այսօր տեղեկություն է եղել նաև ԱԱԾ հակահետախուզության դեպարտամենտի ղեկավարի փոփոխության մասին, իսկ նախօրեին ազատվել էր սահմանապահ զորքերի հրամանատարը: Այդպիսով, պատերազմի մեկ ամսվա ընթացքում տեղի է ունենում ԱԱԾ չորս բարձրաստիճան պաշտոնյայի փոփոխություն:
Ինչպես հայտնի է, օրեր առաջ պաշտոնից ազատվեց ԱԱԾ պետ Արգիշտի Քարամյանը: Գործ ունենք արդյոք ընդհանուր տրամաբանական մի շղթայի հետ, թե պաշտոններից ազատման պատճառները տարբեր են, դժվար է ասել: Մի բան հստակ է, որ պատերազմող երկրում Ազգային անվտանգության ծառայության չորս բարձրաստիճան պաշտոնյաների հաջորդական փոփոխությունը հիմք է տալիս ենթադրելու, որ առաջացել է, եղել է այդ փոփոխությունների էական անհրաժեշտություն, ավելին՝ անհետաձգելի անհրաժեշտություն:
Ինչով է պայմանավորված եղել այդ անհրաժեշտությունը՝ ներքին, թե արտաքին գործոններով, հնարավոր է միայն ենթադրություններ անել, քանի որ տեղեկատվությունը սուղ է: Մյուս կողմից, թերևս, ենթադրությունների ժամանակը չէ և պետք է պարզապես պատերազմող երկրում ընդունել փոփոխություններն ի գիտություն, արձանագրելով լոկ այն, որ դրանք անշուշտ թելադրված են հրատապ անհրաժեշտությամբ, եթե կատարվում են հատուկ ծառայությունում, որն ինքն էլ, բնականաբար, ընթացող պատերազմի փաստացի առաջնագծում գտնվող կառույց է՝ բառի թե՛ բուն, թե՛ նաև պատկերավոր իմաստով: Գլխավորն, անշուշտ, այն է, որպեսզի կառավարման օպերատիվ անհրաժեշտություններն իրացվեն, պաշտպանունակության արդյունավետության անկում թույլ չտալու կամ արձանագրված անկումը արագ վերականգնելու համար: Միևնույն ժամանակ, փոփոխություններն անշուշտ կարող են պայմանավորված լինել մեկ այլ հանգամանքով՝ ոչ թե բացթողումներ կամ սխալներ ուղղելու, այլ կառույցի առաջ նոր խնդիրներ և ռազմավարական առաջադրանքներ դնելու նկատառումով, որոնք պահանջում են գուցե նոր կադրեր: