Լուրեր
Բոլոր ռեսուրսները պետք է կենտրոնացնել Գերագույն հրամանատարի շուրջ. նյարդերի պատերազմի փուլում ենք

Կարող ենք ասել, որ պատերազմին երկար ժամանակ չի մնացել, ավարտը մոտենում է՝ հաշվի առնելով, որ հակառակորդն ունի ռեսուրսների լուրջ խնդիրներ,այդ թվում նաև սոցիալական և քաղաքական ռեսուրսների: Այս մասին «Առաջին լրատվական»-ի հետ զրույցում ասաց «Ժողովրդավարական համախմբում» նախաձեռնության անդամ Սուրեն Պետրոսյանը: Նրա խոսքով՝ Ադրբեջանի հասարակությունն ակնկալում էր, որ բլից-կիրգը կհաջողվի, քանի որ Թուրքիայի նման հզոր պետություն է կանգնած իրենց թիկունքում, և քանի որ դա չհաջողվեց, նրանց ռեսուրսները երկար չեն կարող բավարարել: Նրանց գործողությունները միտված էին Արցախին կապիտուլյացիայի ենթարկելուն»,- նշեց Պետրոսյանը:

Ռազմաքաղաքական հարցերով փորձագետ Արմինե Մարգարյանը կարծիք հայտնեց, որ թևակոխել ենք այնպիսի իրավիճակ, որ արդեն նյարդերի պատերազմ է տեղի ունենում և պետք է պատրաստ լինել դիմակայելու այդ պատերազմին:

«Ե՛վ ռազմաճակատում է թեժ, և՛ դիվանագիտական ճակատում է թեժ, չափազանց ճկուն դիվանագիտական քաղաքականություն է վարվում: Այս պարագայում շատ կարևոր է հանրության դիմադրողականությունը պահպանել և բոլոր ռեսուրսները կենտրոնացնել Գերագույն հրամանատարի շուրջ՝ անկախ քաղաքական հայացքներից ու համակրանքներից: Պետք է հասկանանք, որ վարչապետը ներկայացնում է ոչ թե անձ, այլ ինստիտուտ, պետություն, և պետք է պինդ լինենք, որ այդ ազդակները հասնեն նաև վարչապետին»,- նշեց փորձագետը:

Նա նաև հավելեց, որ իր կարծիքով՝ փոխզիջումների մասին վարչապետի ակնարկը ուղղված էր արտաքին աշխարհին և հնարավորություն էր շոշափելու հանրային տրամադրությունները:

«Ռազամաճակատը շարունակում է մնալ այն տեղը, որը առաջ է մղում մեր քաղաքական ջանքերը, և դրա համար մենք դրական ազդակներ պետք է ուղղենք ռազմաճակատ»,- ասաց ռազմաքաղաքական փորձագետը:

Մանրամասները՝ տեսանյութում:

  • Դիտումներ՝ *