Իրանը հայտարարել է փոխարտգործնախարարին որպես նախագահ Ռոհանիի բանագնաց Երևան, Մոսկվա, Անկարա և Բաքու գործուղելու մասին, որտեղ քննարկվելու են պատերազմին և ստեղծված իրավիճակին առնչվող հարցեր: Թեհրանը հայտարարել է, որ քննարկելու է կարգավորման իրանական նախաձեռնություն: Ի՞նչ է առաջարկում Իրանը, և արդյո՞ք այդ առաջարկը վերաբերում է այսպես ասած՝ Աստանայի ձևաչափի որևէ կրկնության, որի մասին Իրանի արտգործնախարարն ու նախագահը խոսել են ավելի վաղ՝ նշելով, որ կարող է քննարկվել եռակողմ գործակցությամբ ռեգիոնալ հարցեր կարգավորելու մեխանիզմ: Հատկանշական է, որ մինչ այդ Իրանը Հայաստանի և Ադրբեջանի հետ սահման է տարել Իսլամական հեղափոխության պահապանների կորպուսի հատուկ զորքեր և սպառազինություն, միաժամանակ բավականին բարձրաստիճան զինվորականներ այցելում են սահման:
Ընդ որում, մեկ այլ հատկանշական հանգամանք է այն, որ Իրանի նախագահի բանագնացը մինչ չորս մայրաքաղաքներ այցելելը, այցելելու է նաև սահման: Նշանակո՞ւմ է դա արդյոք, որ Թեհրանի առաջարկը վերաբերելու է նաև իրանական սահմանին, որը ներկայումս մարտադաշտ է: Մի բան կասկածից վեր է, որ Իրանն այդ սահմանին տեղակայել է հատուկ զորքեր և սպառազինություն ամենևին ոչ այն պատահական արկերը կամ հրթիռները, կամ ԱԹՍ-ները կանխարգելելու համար, որոնք մարտական գործողությունների ընթացքում ընկնում են Արաքսից այն կողմ: Հատուկ զորքի և սպառազինության տեղակայումը սահմանի երկայնքով նշանակում է, որ Իրանն ունի բոլորովին այլ մասշտաբի և, այսպես ասած, ամենևին ոչ պատահական սպասումներ՝ կապված ռազմական գործողությունների և ռիսկերի հետ: Այդ ֆոնին այսօր Հայաստանի ՊՆ տեղեկություն է հրապարակել, որ ադրբեջանական ուժերը թիրախավորել են Հայաստան-Իրան հատման կետում ՀՀ սահմանապահ ուղեկալը: Այն, որ թշնամին կարող է անել Հայաստանի տարածքի նկատմամբ արկածախնդրության փորձ՝ Նախիջևանի հետ կապի դուրս գալու համար, մեղմ ասած, անհավանական դիտարկել չի կարելի, և Իրանի ռազմական մեծ ներկայությունը սահմանին, թերևս, նաև այդպիսի փորձի ռիսկի համատեքստում է: Եվ այդ համատեքստում պետք է դիտարկել թերևս նաև այն, որ օրեր առաջ համացանցում հայտնվեցին լուսանկարներ Սյունիքից՝ ռուսական ռազմական ճամբարի ծավալման պատկերով: Այդ ֆոնին, ինչ առաջարկներով է Իրանի բանագնացը մեկնելու Երևան, Մոսկվա, Բաքու և Անկարա:
