Հայաստանում հաստատված ռազմական դրության պայմաններում հերթական աղմկահարույց հայտարարությունն է արել Հանրային խորհրդի նախկին նախագահ Վազգեն Մանուկյանը։ Վերջինիս կարծիքով՝ այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում՝ դա պետք է անի կամավոր, առանց ցնցումների, որոնք կարող են կործանարար լինել: «Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ»,- մասնավորապես նշվում է հայտարարության մեջ։
Գերագույն խորհրդի պատգամավոր Վիգեն Խաչատրյանի կարծիքով՝ պատերազմի պայմաններում իշխանության հրաժարականը պահանջելն անլուրջ, անհավասարակշռված ու ոչ խելամիտ քայլ է: «Ամենամեծ վնասը, որ ինքներս մեզ կարող ենք հասցնել, իհարկե երկրում անկայուն իրավիճակ հրահրելն ու ստեղծելն է»,- «Առաջին լրատվական»-ի հետ զրույցում ասաց նա՝ միևնույն ժամանակ անհնարին համարելով Հայաստանում հեղաշրջում իրականացնելը։
Մեր զրուցակցի կարծիքով՝ Հայաստանում քաղաքական դաշտն այսօր օրիգինալ վիճակում է հայտնվել: «Քաղաքական ուժերը գրեթե իսպառ բացակայում են։ 30 տարվա մեջ այսպիսի իրավիճակ ես չեմ հիշում»,- ընդգծեց նա։
«Ժողովրդավարական հայրենիք» կուսակցության նախագահ Պետրոս Մակեյանի կարծիքով՝ իրավիճակը գնահատելու համար պետք է մի քիչ հեռվից գանք: «Մենք նախադեպային տարբերակ ունենք։ Արցախի առաջին պատերազմի հաջողությունները կապված էին Ադրբեջանում նմանատիպ գործընթացների, հեղաշրջումների, անհանդուրժողականության մթնոլորտի հետ»,- «Առաջին լրատվական»-ի հետ զրույցում ասաց նա։
Մեր զրուցակցի կարծիքով՝ այժմ նման գործընթաց նախաձեռնողներն ունեն փորձ, հասկանում են՝ ինչ հանգրվանի կհասնենք նման սցենարի դեպքում. «Իրենք կարող է գան իշխանության, բայց մենք չենք ունենա Արցախ, կկորցնենք տարածքներ ու շատ զոհեր կունենանք։ Արժե՞ այդ գնով հասնել ինչ-որ նպատակի։ Ես բազմիցս ասել եմ, որ դժգոհ եմ այս իշխանություններից, լրջանալու բազմաթիվ կոչեր եմ արել, բայց այս փուլում նման տարբերակի գնալը կործանարար է մեր երկրի համար։ Առանց այն էլ շատ ծանր վիճակում ենք»։