«Հանուն Հանրապետության ժողովրդավարության պաշտպանների դաշինք» կուսակցության ղեկավար մարմնի անդամ Ռոբերտ Ղևոնդյանը, որը նոր է վերադարձել ռազմաճակատից, «Առաջին լրատվական»-ի հետ զրույցում նշեց, որ Ադրբեջանի ներկայությունն այնտեղ ընդամենը էպիտետային է. «Ադրբեջանի անվան տակ իրականում կռվում է Թուրքիան՝ որոշ առումով ներգրավելով նաև ադրբեջանական զինված ուժերը»:
Ինչ վերաբերում է վարչապետ Փաշինյանի նախօրեի հայտարարությանը, մեր զրուցակիցն ասաց. «Առաջին անգամ հնչեց «ցավոտ փոխզիջումներ» արտահայտությունը, որը հայ հասարակության համար, բնականաբար, այնքան էլ ընդունելի չէր՝ հաշվի առնելով այն, որ մենք պայքարում ենք և ունենք բավականին շատ կորուստներ՝ թե մարդկային, թե այլ առումներով: Հասարակությունը սպասում է ավելի ոգևորող ելույթների: Մյուս կողմից՝ վարչապետը շատ ավելի ռեալիստ էր»:
Նրա խոսքով՝ հայ զինվորը սխրագործություններ է գործում և կռվում է իրեն բազմակի գերազանցող ուժի դեմ ու հրաշքներ գործելով կարողանում է հաղթել այդ անհավասար մարտում. «Սակայն հրաշքներն անվերջ չեն, դրանք կարող են մի օր սպառվել, և որպեսզի հայ զինվորի թիկունքն ապահովվի, պետք է աշխատի դիվանագիտությունը. այլ տարբերակ չունենք»:
Ռոբերտ Ղևոնդյանը կարծում է, որ արդեն պետք է միջազգային հանրության հետ խոսենք շանտաժի, սպառնալիքի լեզվով. «Ասենք՝ գնում ենք վա բանկ»:
Մանրամասն՝ տեսանյութում: