«Վերջին 4 տարիներին Թրամփն ինչ որոշում կայացնում է, ինչ հայտարարություն անում է՝ կապված է իր վերընտրության հետ»,-«Առաջին լրատվական»-ի հետ զրույցում նման տեսակետ հայտնեց Կալիֆորնիա Կյուրիեր թերթի խմբագիր Հարութ Սասունյանը։
Նրա խոսքերով՝ ԱՄն նախագահը կայացնում է այնպիսի որոշումներ, որոնք օգտակար են անձամբ իրեն և ոչ երկրին.«Այս անգամ էլ, երբ վերջին օրերին երեք տարբեր անգամ նա հայերի մասին, հայերն անմիջապես խանդավառվեցին, թե շուտով Թրամփը հայերի համար մի բան կանի։ Բայց մենք գիտենք, որ Թրամփը ոչ մի ուշադրություն չի դարձնում հայերի վրա։ Այսքան տարի նա ոչինչ չի արել հայերի համար ու այդ խանդավառությունը միանգամայն իզուր է»,-նկատեց մեր զրուցակիցը։
Շարունակելով իր միտքը Հարութ Սասունյանն ընդգծեց. «Երկու արտգործնախարարների հանդիպումը եղավ պետքարտուղար Մայք Պոմպեոյի հետ, ստորագրեցին հրադադար։ Թրամփը հայտարարեց, թե հրադադարը պահպանվում է, մինչդեռ ամբողջ աշխարհը գիտի, որ այն չի պահպանվում։ Ադրբեջանցիները երրորդ անգամ խախտեցին հրադադարը ու այժմ ես հույս չունեմ, որ Թրամփը գործնական քայլեր կանի ադրբեջանցիներին ու թուրքերին ճնշելու համար։ Թուրքիան է վերահսկում Ադրբեջանի հարձակումները։ Դժբախտաբար մենք նորից մենակ մնացին։ Ո՛չ Ամերիկան է ուզում օգտակար լինել և ոչ էլ Ռուսաստանը, խոսքերով շատ բան են ասում, բայց ոչ գործնական քայլերով»։
Ըստ Սասունյանի՝ Թուրքիան այժմ գործում է որպես անկախ պետություն և ոչ որպես ՆԱՏՕ-ի անդամ.«Այս հարցը ՆԱՏՕ-ի հետ ոչ մի կապ չունի։ Այն, ինչ անում է Թուրքիան, անում է որպես անկախ երկիր և ոչ որպես ՆԱՏՕ-ի անդամ։ ՆԱՏՕ-ի մյուս անդամները կարող են խորհուրդ տալ, բայց ոչ ճնշել Թուրքիան։ Եվ դա չէ գլխավոր հարցը։Վերջին երեք-չորս տարիների ընթացքում Թրամփը բազմիցս զրուցել է Էրդողանի հետ, տարբեր երկրներում բազմաթիվ հանդիպումներ են ունեցել։ Թրամփն ինքն ասել է, որ շատ սիրում է Էրդողանին, շատ մտերիմ են, նա շաբաթը մի քանի անգամ զանգում է Սպիտակ տուն ու խոսում Թրամփի հետ։ Եթե Թրամփը այդքան մտերիմ հարաբերություններ ունի, ապա մեկ զանգով կարող է Էրդողանին ասել, որ նա դադարեցնի հարձակումներն Արցախի վրա։ Բայց դժբախտաբար նա դա չի անում, որովհետև առանձնապես ոչ մի շահ չունի Արցախից ու հայերից։ Պարզապես խոսում է ճիշտ այնպես, ինչպես մյուս բոլոր հարցերի մասին։ Ոչ մի կոնկրետ գործողություն չկա»,-եզրափակեց նա։