Նախընտրական տրամադրություններին հատուկ ելույթ էր և բազմանշանակ: Այս մասին «Առաջին լրատվական»-ի հետ զրույցում ասաց «Հանուն հանրապետության» կուսակցության անդամ Արտաշես Խալթյանը՝ անդրադառնալով Դ. Թրամփի երեկվա ելույթին, որտեղ նա անդրադարձել է արցախյան հակամարտությանը: «Հայերը կռվում են կատաղի: Մենք ինչ-որ բան կանենք, նման մի բան, ինչ Կոսովոյում»,- իր ելույթում ասել է Թրամփը:
«Կարծում եմ՝ Թրամփը գիտակցաբար այնպիսի եզրութաբանություն է օգտագործել, որը հետագայում տարրակերպ մեկնաբանությունների տեղիք կտա: Խոսքի սկզբում ակնարկում է Կոսովոյի անկախության ճանաչման մասին, սակայն հետո անդրադառնում է նրան, որ իր միջնորդությամբ Կոսովոյի և Սերբիայի միջև առևտրատնտեսական պայմանագրի կնքումը կայացավ: Այսինքն՝ մի կողմից կարծես թույլ է տալիս իր խոսքը մեկնաբանել որպես Արցախի անկախության հնարավոր ճանաչում, մյուս կողմից՝ տեղ է տալիս մեկնաբանել այնպես, որ ինքը Արցախի հարցը կլուծի ինչ-որ կերպ»,-ասաց Խալաթյանը:
Նրա խոսքով՝ հատկանշական է, որ, թերևս, առաջին անգամ է Կոսովոյի հանգամանքը շոշափվում Արցախի թեմայի շրջանակներում. «Կարծում եմ դա դրական քայլ է: Բայց ինչպես նախորդիվ Պոմպեոն էր ասել՝ հուսով ենք, հայերը կդիմանան, այնպես էլ այս դեպքում բավականին մեծ խաղադրույք է արված մեր Զինված ուժերի մարտունակության և դիմադրողունակության վրա: Այսինքն՝ մենք ենք, թե՛ որպես ժողովուրդ, թե՛ որպես բանակ, մեր մարտունակությամբ ու դիմադրողականությամբ դրդելու միջազգային հանրությանը այս կամ այն լուծման»:
Երեկ Ալիևի հռետորաբանությունը խաղաղասիրական էր, այսօր կտրուկ փոխվել է. ի՞նչ բացատրություններ ունեն այդ ամպլիտուդները: Անդրադառնալով այս հարցին՝ վերլուծաբան Աղասի Մարգարյանը նշեց, որ վերջին երեք-չորս օրերին է Ալիևի հռետորաբանությունը խաղաղասիրական, բայց կեղծ խաղաղասիրական է: «Շատ հաճախ է սկսել խոսել հրադադար մասին, բայց ստեղծվել է իրավիճակ, երբ Ալիևի դերը որոշիչ չէ, և, ըստ երևույթին, նրա հետ որևէ բանակցային կամ հրապարակային խոսակցություն իմաստ չունի ունենալ: Երեք հրադադարի դեպքում էլ հրադադարը խախտվեց: Վարչապետն ասաց դիվանագիտական լուծումն այս պահին հնարավոր չէ, քանի որ Ալիևը հանդես է գալիս առավելապաշտական հռետորաբանությամբ և պահանջում է հայկական կողմի կապիտուլյացիա»,-ասաց վերլուծաբանը:
Անդրադառնալով Թուրքիայի միջազգային հարաբերություններին՝ մասնավորապես ԱՄՆ-ի, Ռուսաստանի և Ֆրանսիայի հետ հարաբերություններին, Խալաթյանը նշեց, որ Էրդողանը դիրքավորվում է որպես իսլամական աշխարհի առաջնորդ: «Նա խաղում է ազգայնական թևի զգացմունքների վրա և փորձում է դառնալ խալիֆ: Թուրքիան գնալով հեռանում է աշխարհիկ պետության արժեքներից՝ դառնալով դասական կրոնապետություն: Իսկ Ադրբեջանը ամենահարմար «թնդանոթի միսն» է Էրդողանի համար: Ադրբեջանը սրընթաց կերպով վերածվում է Թուրքիայի վիլայեթի»:
Մանրամասն՝ տեսանյութում: