Մոսկվան ակնկալում է, որ Անկարան կկատարի Ստամբուլի Սբ.Սոֆիայի տաճարի՝ որպես ՅՈՒՆԵՍԿՕ-ի համաշխարհային ժառանգության օբյեկտի, կարգավիճակի հետ կապված իր պարտավորությունները: Այս մասին հայտարարել է ՌԴ ԱԳՆ ղեկավար Սերգեյ Լավրովը՝ Աթենքի մակեդոնական լրատվական գործակալությանը (AMNA) տված հարցազրույցում:
Նա շեշտել է, որ Սուրբ Սոֆիայի տաճարը ռուսաստանցիների համար հատկապես արժեքավոր է հոգևոր տեսանկյունից: «Մենք ելնում ենք նրանից, որ թուրքական կողմը, ինչպես մեզ բազմիցս հավաստիացրել է, կառաջնորդվի փոխադարձ հարգանքի սկզբունքներով, պատշաճ ուշադրությամբ կվերաբերվի ուղղափառ հավատացյալների զգացմունքներին և կկատարի օբյեկտի կարգավիճակի հետ կապված բոլոր կանոնների ու պայմանների պահպանման իր պարտավորությունները, կապահովի տաճարի ամբողջական անվտանգությունն ու զբոսաշրջիկների և ուխտավորների համար հասանելիությունը»,- ասել է ՌԴ ԱԳՆ ղեկավարը: Ինչպես նշել է Լավրովը, ռուսական կողմն իր դիրքորոշումը պարբերաբար փոխանցում է թուրք գործընկերներին, այդ թվում՝ ամենաբարձր մակարդակներում:
Նրա խոսքով, տաճարի վիճակը գնահատելու համար կարևոր է ՅՈՒՆԵՍԿՕ-ի Համաշխարհային ժառանգության կենտրոնի փորձագետների դիտորդական առաքելության գործունեությունը:
«Հուսով ենք, որ այս տարվա հոկտեմբերի 5-9-ը անցկացված ստուգման արդյունքների հիման վրա հանձնաժողովի եզրակացությունները կներկայացվեն կարճ ժամանակում, այդ թվում` փորձագիտական եզրակացություն թուրքական կողմից իրականացվող վերականգնման աշխատանքների որակի վերաբերյալ, ինչպես նաև բոլոր կրոնների ներկայացուցիչների համար Սուրբ Սոֆիայի տաճար անարգել մուտքի ապահովման վերաբերյալ նկատառումներ»,- եզրափակել է նա:
