«Ռուսական միգրացիոն գրասենյակները փակելու պահանջը հետևանք է, իսկ պատճառը երկրի տնտեսական վիճակն է, կառավարման համակարգի կրախը»,- «Առաջին լրատվական»-ի հետ զրույցում, մեկնաբանելով «Հիմա» երիտասարդական նախաձեռնության՝ ռուսական միգրացիոն գրասենյակները փակելու պահանջը, ասաց նախաձեռնության անդամ Արթուր Գրիգորյանը։
Նրա խոսքով՝ այդ գրասենյակները Հայաստանի տարածքում գործում են ապօրինի, այսինքն՝ չկա իրավական հիմք, որի հիման վրա դրանք գործեին։ Ցանկացած կառույց պետք է գրանցված լինի պետռեգիստրում, սակայն դրանք գրանցված չեն։
Նախաձեռնությունը ռուսական միգրացիոն գրասենյակների հարցով սկսել է զբաղվել փետրվարից, կատարել է բազմաթիվ հարցումներ, ուսումնասիրել դրանց գործունեությունն ու պարզել, որ գործունեություն ծավալելու իրավական հիմքը բացակայում է։
«Միջպետական հանձնաժողով կազմելու իմաստ չկա, որովհետև դա ֆարս է։ Ի՞նչ իմաստ ունի ապօրինի կառույցի վերաբերյալ ինչ-ինչ բանակցություններ անցկացնել։ Այդ ապօրինի կառույցը պետք փակել»,- ասաց Ա.Գրիգորյանը՝ ավելացնելով, որ ինչ-որ մեկին պահանջ ներկայացնելն էլ է խնդիր, քանի որ այդ կառույցը որևէ տեղ գրանցված չէ։
«Մենք անգամ մտածում ենք դատական հայց ներկայացնել, բայց Հայաստանի պետական համակարգում չկա մի կառույց, որ պատասխանատվություն կրի ռուսական միգրացիոն գրասենյակների համար»,- ասաց «Հիմա» երիտասարդական նախաձեռնության անդամ Ա.Գրիգորյանը։