Ալիևն ու Էրդողանը սիոնիստների ձեռքով 1915 թվականի շարունակությանն են պատրաստվել. սա հստակ ծրագրավորված էր, միշտ էլ ասել եմ, որ կռիվ է լինելու, չէիք հավատում, կռիվը եղավ, հիմա ասում եմ հաղթելու ենք, կարող է էլի չեք հավատում, բայց հաղթելու ենք: Այս մասին «Առաջին լրատվական»-ի հետ զրույցում նշեց Լեռնային Ղարաբաղի ինքնապաշտպանության ուժերի առաջին հրամանատար, Ղարաբաղյան պատերազմի վետերանների միության նախագահ, գեներալ Արկադի Կարապետյանը:
«Հաղթելու ենք, որովհետև սա ուրիշ պատերազմ է, սա չարի ու բարու պատերազմ է, և Աստված մեր կողմն է, մեզ հաղթանակ է պարգևելու։ Սա խրատ է, որ պետք է հասկանանք։ Ամեն մարդ պետք է իր գործն անի, ոչ հերոսություն է պետք, ոչ այլ ջանքեր: Պետք է այսօրվանից հետո այդպես գործենք, ծանոթ-բարեկամ հասկացողությունից հատկապես բանակը պետք է ազատվի և դեմոկրատիա հասկացողությունը պետք է բանակում հաստատվի։ Աստծո օրհնությունն էլ ամենակարևորն է։ Աստված մեզ հետ է, և մենք հաղթելու ենք։ Իսկ այս հաղթանակից հետո կզանգես կասեմ, որ մյուս պատերազմում զոհեր չունենանք»,-ասաց նա:
Հարցին, թե դեռ որքան կձգվի պատերազմը, Արկադի Կարապետյանը պատասխանեց, որ երկար չի տևի, շուտով ամեն ինչ լավ է լինելու։
Ինչ վերաբերում է Արցախի նախագահ Արայիկ Հարությունյանի՝ Պուտինին ուղղված բաց նամակին, նա նկատեց, որ կյանքը ցույց է տալիս, որ մինչև հիմա մենք միայնակ ենք կռվում. «Երևի էսօրվա դրությամբ փաստորեն միակ դաշնակիցը Ռուսաստանն է, մնացածը խոսում են միայն, լավ բաներ են ասում, ինչ-որ քաղաքներ Արցախի անկախությունն են ճանաչում: Տես քանի հազար քաղաք կա, եթե օրը մեկը ընդունի, քանի՞ տարի է պետք, բոլորին շնորհակալ եմ, բայց դա հարցի լուծում չէ, իրենց բարի խոսքերը մեզ օգուտ չեն, պետք է գործ անեն: Ֆրանսիան լավ բաներ է ասում, լավ բաներ է անում, հասկացանք, բայց որևէ փամփուշտ չի ուղարկում, ինքնաթիռ չի տալիս, իսկ մեզ առաջնահերթ դա է պետք, իսկ եթե դա չկա, ինչքան ուզում է թող կենաց ասի:
Ես այստեղ ամեն օր մահ եմ տեսնում, մեզ վրա ամեն օր արկ է գալիս, մենք իրավիճակը այլ կերպ ենք գնահատում, դու այլ: Այսօր ես այստեղ տեսնում եմ Ռուսաստանին։ Որդիս առաջնագծում է, ամեն օր իր դիրքի վրա 40-50 արկից մինչև 500 արկ են գցում, Մակրոնը Ֆրանսիայից լավ բաներ է ասում, բայց դրանից արկերը չեն պակասում: Կոնկրետ քայլեր են պետք, շատ կոնկրետ»,-ընդգծեց Արկադի Կարապետյանը:
