ԱՄՆ պետքարտուղար Մայք Պոմպեոն Հայաստանի և Ադրբեջանի արտգործնախարարների հետ Վաշինգտոնում տեղի ունեցած հանդիպումներից հետո արել է հայտարարություն, որտեղ խոսել է կրակի դադարեցման անհրաժեշտության մասին և կոչ արել կողմերին անցնել առարկայական բանակցության` Հելսինկյան եզրափակիչ ակտի երեք սկզբունքների հիման վրա: Ինչպես հայտնի է, դրանք են ուժի չկիրառումը և ուժի սպառնալիքի բացակայությունը, տարածքային ամբողջությունը, ինքնորոշման իրավունքը:
ԱՄՆ նախագահ Դոնալդ Թրամփն իր հերթին լրագրողների հետ զրույցում հայտարարել է, որ ներգրավված է բանակցությանը: Ավելին, նա նույնիսկ խոսել էր «լավ առաջընթացի մասին»։ Այդ հայտարարությանն անմիջապես արձագանքել է ՌԴ նախագահի խոսնակ Դմիտրի Պեսկովը՝ նշելով, թե իրենց հայտնի չէ, թե ինչ առաջընթացի մասին է խոսել Թրամփը։
Քաղաքագետ Գարիկ Քեռյանը թեպետ կարծում է, որ արված հայտարարությունն անորոշ է և այս փուլում անհնար։ Այդուհանդերձ մեր զրուցակիցը ողջունում է փաստը, որ Միացյալ Նահանգներն ու Ռուսաստանն այս հարցում համատեղ ջանքեր են փորձում գործադրել.«Ես որքանով հասկանում եմ Ռուսաստանն աջակցում է, որ Միացյալ Նահանգների հետ էլ բանակցությունները շարունակվեն։ Այսինքն՝ մեկը մյուսի դեմ չի աշխատում, ընդհանուր ճակատով են գործում։ Ռուսաստանի հույսն այն է, որ Միացյալ Նահանգները որպես ՆԱՏՕ-ի առաջատար պետություն ներազդի Թուրքիայի վրա, որպեսզի վերջինս գնա հաշտության։ Այդ պատճառով էլ հավանաբար հավանություն է տվել, որ Վաշինգտոնում այդ հանդիպումը լինի»,-«Առաջին լրատվական»-ի հետ զրույցում ասաց նա։
Ըստ Քեռյանի՝ ամեն ինչ կախված է նրանից՝ արդյոք Միացյալ Նահանգներն ու Ռուսաստանը կկարողանան ներազդել Թուրքիայի վրա.«Որովհետև այսօր Ալիևն ինքնուրույն որոշումներ չի կայացնում, որոշման կենտրոնն Անկարան է»։
Քաղաքագետ Արմեն Վարդանյանի կարծիքով՝ ամերիկյան կողմը պարզորոշ կերպով հասկացրեց Ադրբեջանին, որ ռազմական գործողությունների շարունակումը ամերիկյան կողմի համար անընդունելի է ու կոչ արեց վերադառնալ բանակցային ձևաչափ.«Ըստ իս՝ դա ինչ-որ կերպ կարող է կապված լինել ԱՄՆ-ում կայանալիք նախագահական ընտրությունների հետ։ Դոնալդ Թրամփի գործերն այնքան էլ լավ չեն, նրա վարկանիշը բավականին զիջում է Ջո Բայդենի վարկանիշին ու միգուցե նրանք կփորձեն ստանալ հայ ընտրազանգվածի ձայները։ Այս շրջանում հայերին սիրաշահելու համար, հնարավոր է նրանք ճնշումներ գործադրեն ԱՄՆ-ի վրա ու Հայաստանի օգտին քայլեր իրականացնեն»,-«Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ ամերիկյան ու ռուսական կողմի ջանքերն այս փուլում մեկտեղված են.«Դոնալդ Թրամփի վարչակազմը իզոլացիոնիստական քաղաքականություն է վարում և այս տարածաշրջանում, Դոնալդ Թրամփի ընտրվելուց հետո, ԱՄՆ-ն բավականին պասիվացել է։ Կարծես թե իրենք ավելի շատ Ռուսաստանին են զիջել այս հակամարտությունը՝ այսինքն կոնֆլիկտը կառավարելու մենիշխանությունը։ Ու իրենք միայն կողքից են դիտում։ԱՄՆ-ն էլ դեմ չէ, որ Ռուսաստանը այս կոնֆլիկտի մեջ լինի գլխավոր աշխարհաքաղաքական խաղացողը»։