Թուրքիայի նախագահ Թայիփ Էրդողանի ռազմատենչ քաղաքականությունը ավելի ու ավելի է անհանգստացնում, հատկապես որ Թուրքիան այլևս աշխարհիկ երկիր չէ: Այս կարծիքն է հայտնել Ֆրանսիայի զինված ուժերի գլխավոր շտաբի նախկին պետ Պիեռ դե Վիլյեն՝ BFM հեռուստաալիքին տված մեծ հարցազրույցում:
«Էրդողանի Թուրքիան այժմ, իր իսկ հայտարարությունների համաձայն, հավատարիմ է Օսմանյան կայսրությունը վերականգնելու ռազմավարությանը: Եվ Թուրքիան այդ մանիֆեստը կյանքի է կոչում համապատասխան ռազմական ժեստերով: Օրինակ՝ Սիրիայում քրդերի ոչնչացմամվ, Լեռնային Ղարաբաղում իր գործողություններով», – ասել է բանակի գեներալը:
«Մի օր միջազգային հանրությունը և, մասնավորապես, Ֆրանսիան, պետք է վերջ տան դրան: Մենք չենք կարող համաձայնել, որ այնպիսի երկիր, ինչպիսին Թուրքիան է, որի անդամակցության բանակցությունները ԵՄ-ին դեռ պաշտոնապես չեն ավարտվել, շարունակի այս հռետորաբանությունը և նման գործողությունները որպես ՆԱՏՕ-ի անդամ», – նշել է Դե Վիլյեն:
Ըստ գեներալի՝ ներկայիս իրողություններում միջազգային ասպարեզում «բարեկամներ» և «թշնամիներ» հասկացությունները մշուշվել են, և այդ ֆոնին Ֆրանսիան հատուկ հստակ դիրքորոշման կարիք ունի նրանց կողմից, ովքեր հայտարարում են իրենց աջակցությունը ահաբեկչության և արմատական իսլամիզմի դեմ պայքարին:
«Թուրքիան [իսլամիստներին] սատարողների շարքում է: Նա ֆինանսավորել է այդ շարժումներից մի քանիսը, և դա լավ հայտնի է: Կարծում եմ, որ Թուրքիան այլևս աշխարհիկ պետություն չէ, ակնհայտորեն իսլամական երկիր է: Դա ինձ հատկապես անհանգստացնում է », – հավելել է նա: