«Վալդայ» քննարկումների ակումբում Ռուսաստանի նախագահ Վլադիմիր Պուտինը երեկ անդրադարձել է Լեռնային Ղարաբաղի իրավիճակին: Նա նշել է, որ թե՛ ադրբեջանական, թե՛ հայկական կողմից մեծաթիվ զոհեր կան, իրենց տվյալներով՝ յուրաքանչյուր կողմից 2 հազարից ավելի զոհ, զոհերի ընդհանուր թիվը մոտենում է 5 հազարի: Ռուսաստանի նախագահն ասել է, թե շատ կցանկանար որևէ փոխզիջում գտնել, ամեն օր մի քանի անգամ խոսում է Հայաստանի վարչապետի և Ադրբեջանի նախագահի հետ:
Վաշինգտոնում Միացյալ Նահանգների պետքարտուղար Մայք Պոմպեոյի հետ Հայաստանի և Ադրբեջանի արտգործնախարարների այսօր կայանալիք հանդիպումների առնչությամբ Պուտինն ասել է՝ մեծ հույսեր ունի, որ ԱՄՆ-ը համատեղ կգործի, կաջակցի կարգավորման ջանքերին: Չխորանալով բանակցությունների մանրամասների մեջ՝ նա ասել է, թե լարված աշխատանք է տարվել կողմերի դիրքորոշումները մերձեցնելու համար, որոշ պահերի թվում էր, թե մի փոքր էլ, մի քիչ էլ, մի քայլ էլ, և՝ կգտնվի լուծումը, դժբախտաբար դա տեղի չունեցավ, և «այսօր մենք ունենք հակամարտություն՝ վատթարագույն տարբերակով»:
«Հիմա առաջինը, ինչ պետք է անել՝ անհապաղ դադարեցնել մարտական գործողությունները: Այդ մասին ձեռք բերված համաձայնությունը, ցավոք, չկատարվեց, պետք է ձգտել հասնելու դրա իրականացմանը»,- ընդգծել է Ռուսաստանի նախագահը:
Ռուսաստանի գիտությունների ակադեմիայի Արևելագիտության ինստիտուտի գիտաշխատող, քաղաքագետ Ալեքսանդր Սկակովի կարծիքով՝ իրավիճակը բացասական է ոչ միայն տարածաշրջանի, Լեռնային Ղարաբաղի, այլ հենց նաև Ռուսաստանի համար: «Ռուսաստանը ձգտում է միջնորդի դեր ստանձնել, այս տարածաշրջանում առաջատար գերտերություն լինելով՝ պատերազմական գործողությունների ցանկացած շարունակություն կամ դրա ձգձգում հարվածում է նաև Ռուսաստանի այդ իմիջին։ Ուստի Ռուսաստանը հետաքրքրված է, որ պատերազմը որքան հնարավոր է շուտ ավարտվի։ Բայց երևում է՝ դա դեռ այնքան էլ լավ չի ստացվում»,- «Առաջին լրատվական»-ի հետ զրույցում ասաց նա։
Հարցին՝ Ռուսաստանը դեռ հնարավորություն ունի՞ որևէ բան անելու, թե՞ իրավիճակն արդեն դուրս է եկել վերահսկողությունից, ու դիվանագիտական ճանապարհը տեսանելի չէ, մեր զրուցակիցը պատասխանեց. «Միշտ էլ հակամարտող կողմերի վրա կան ճնշում գործադրելու հնարավորություն ու տարբերակներ։ Այժմ, սակայն, Ռուսաստանը գործում է Մինսկի խմբի շրջանակներում և այնքան էլ չի փորձում ինքնուրույն դեր խաղալ այս հակամարտության մեջ։ Բայց պետք է հաշվի առնենք, որ այս հակամարտությունը Ռուսաստանի անվտանգությանը սպառնում է ավելի շատ, քան Եվրամիությանն ու Միացյալ Նահանգներին, ուստի ես կարծում եմ, որ Ռուսաստանը ավելի մեծ դեր պետք է խաղա»։
Դեսանտային օպերացիա իրականացնելու հնարավորության մասին մեր հարցին ի պատասխան Սկակովն ասաց. «Դա, իհարկե, չափազանցություն է, բայց ռազմական ճնշման որոշակի սպառնալիք միանգամայն կարող է լինել։ Իսկ դեսանտային օպերացիան ֆանտաստիկայի ժանրից է։ Բայց հաշվի առնելով այն ռազմական ռեսուրսը, որ Ռուսաստանն ունի, իր դերը կարող է շատ ավելի մեծ լինել»։
