Այսօր առավոտյան ադրբեջանական ԶՈՒ֊երը շարունակել են իրենց հարձակողական գործողությունները՝ ռազմաճակատի տարբեր ուղղություններով։ Այս մասին այսօր ասուլիսում ասաց ՀՀ ՊՆ ներկայացուցիչ Արծրուն հովհաննիսյանը։
«Բացի ռազմաճակատում տիրող մարտական գործողություններից՝ օրվա ընթացքում հրթիռակոծվել են Արցախի տարբեր բնակավայրերը, այդ թվում՝ Մարտակերտ քաղաքը՝ հարակից բնակավայրերով և Բերձոր քաղաքը՝ հարակից բնակավայրերով։ Երեք արկ ընկել է Բերձորի տարածաշրջանում։ Օրվա ընթացքում հատկապես թեժ են եղել կենտրոնականից հարավ ընկնող Շեխեր, Ջիվանիկ և հարակից գյուղերում դիվերսիոն ներթափանցման գործողություններ իրականացրած ադրբեջանական հրոսակախմբերի և դիվերսիոն խմբերի չեզոքացման աշխատանքները և այդ ուղղությամբ կան հստակ հաջողություններ, մասնավորապես, գրեթե լիովին մաքրվել է Շեխեր բնակավայրը՝ իր հարակից անտառներով»,-ասաց ՊՆ ներկայացուցիչը:
Նա նաև հայտնեց, որ այսօր հարավային ուղղությամբ գրեթե ողջ օրն ադրբեջանական ԶՈՒ ստորաբաժանումները փորձել են գրոհել Որոտանի ուղղությամբ, մի քանի հարձակման փորձեր տապալվել է, որից հետո, զգալի կորուստներ կրելով, հետ են շպրտվել, որոշ ստորաբաժանումներ կազմալուծվել են, դիմել են փախուստի և փորձել են պատսպարվել մոտակա անտառներում։
«Բերձորից հարավ կոնկրետ ուղղությունը դեպի Հագարի գետով հյուսիս հետ է մղվել դեպի ավելի հարավ՝ մեր ԶՈՒ հարձակումների ազդեցության տակ:
Հովհաննիսյանի խոսքով՝ ընդհանուր առմամբ լարվածությունը պահպանվում է, մարտերն ընթանում են օջախային, հստակ բնակգծեր չկան, տարբեր գետերի, հանգույցների, ճանապարհների շուրջ փորձում են հարձակումներ իրականացնել, որը չեզոքացվում են մեր Զինված ուժերի կողմից։
