Ռուսաստանի մոտեցումները հետևյալն են՝ Ռուսաստանը այլ կերպ և ավելի խոր չի համագործակցի հայկական կողմերի հետ, քան արդեն համագործակցում է, Թուրքիայի հետ Ռուսաստանը բավականին բարիդրացիական հարաբերություններ ունի այլ հարցերում, թեև Արցախի և Հայաստանի հետ կապված հարցերում անհամաձայնությունների շարք կա, և Ռուսաստանի մասնակցությունը հակամարտության կարգավորման գործում ավելի արդյունավետ կլինի, եթե կողմերը համաձայնվեն, որ ՌԴ խաղաղապահ զորքեր լինեն Արցախում: Սա էր Վլադիմիր Պուտինի ուղերձը, որը նորություն չէր, մինչ այդ էլ մենք մի քանի անգամ լսել ենք այդամենի մասին: Այս մասին «Առաջին լրատվական»-ի հետ զրույցում ասաց Երևանի մամուլի ակումբի նախագահ Բորիս Նավասարդյանը՝ անդրադառնալով «Վալդայ» միջազգային ակումբում քննարկումների ժամանակ ՌԴ նախագահ Վլադիմիր Պուտինի ելույթին, որտեղ նա անդրադարձել է արցախյան հակամարտությանը:
Արցախի նախագահ Արայիկ Հարությունյանը նամակ է հղել ՌԴ նախագահ Վլադիմիր Պուտինին, որ նա հնարավոր բոլոր ջանքերը գործադրի՝ ադրբեջանաղարաբաղյան հակամարտության գոտում պատերազմի դադարեցման և քաղաքական գործընթացների ուղղությամբ, ինչպես նաև անդրադարձել է Արցախի ու Ռուսաստանի դարավոր բարեկամությանը: Անդրադառնալով այս դիտարկմանը՝ Բորիս Նավասարդյանը նշեց, որ դրանով կարևորվում է Ռուսաստանի աջակցության դերը խաղաղության հաստատման գործում և Արցախի նախագահի նամակը պատասխանն էր Ռուսաստանի այն հայտարարություններին, որ հայկական կողմը իրենց չի դիմում:
Մանրամասները՝ տեսանյութում:
