Նախօրեին Ադրբեջանը կրակ է բացել Իրանի խաղաղ բնակիչների տների ուղղությամբ, ինչի հետևանքով Իրանի սահմանամերձ բնակավայրերի տներն ավերվել են: Իրենց դիրքերը հյուսիս-հարավ ուղղությամբ տեղակայելու փոխարեն՝ Բաքվի ուժերը տեղակայվել են արևելք-արևմուտք ուղղությամբ։
Այս առնչությամբ «Առաջին լրատվական»-ը զրուցել է Իրանում բնակվող փաստաբան Ժոզեֆ Ամիրյանի հետ: Մեր զրուցակիցը նշեց՝ ակնհայտ է, որ թուրք-ադրբեջանական ճակատը ձգտում է հայ-ադրբեջանական հակամարտությունը վերածել տարածաշրջանային տագնապի:
«Ուստիև ամեն ինչ անում են այդ նպատակին հասնելու համար: Նրանք, տեղավորվելով Իրան-Արցախ սահմանագծում, փորձում են հասնել նրան, որ հայկական պաշտպանական բանակի գրագետ հակադարձող կրակը հանգչի իրանական տարածքում՝ Իրանին ներքաշելով պատերազմում, ինչից ցայժմ խուսափում է Իրանը: Բայց ես համոզված եմ, որ եթե այս հրահրումները շարունակվեն, Իրանը առհավետ ականատեսի դերում չի մնա՝ անկախ այն երևույթից, որ իր քաղաքացիների անվտանգության պահպանման հարցն է դրված սեղանի վրա: Չեմ կարծում, որ Իրանի համար անտեսանելի է թուրքական այս վտանգավոր թատերգությունը»,-ասաց փաստաբանը:
Ինչ վերաբերում է մարդկային և նյութական վնասներին, նա նշեց, որ դեռ պաշտոնական տվյալներ չեն հրապարակվել, և ըստ երևույթին, ցայժմ տուժածներ չկան, և վնասները միայն նյութական են:
Հարցին, թե ի՞նչ ռիսկեր են առաջ եկել ստեղծված իրավիճակում Իրանի համար, Ժոզեֆ Ամիրյանը պատասխանեց. «Ռիսկերը Իրանի համար, կարծում եմ, մեծ են, որովհետև մոլեռանդ ջիհադիստներից բացի՝ Բաքվի իշխանությունը ռազմավարական հակաիրանական խոր գործարքների մեջ է Իսրայելի իշխանությունների հետ, և, ինչպես նշեցի, Իրանը լավ է գիտակցում, թե որ ուժերն են և ինչի են ձգտում։ Իրանում, համոզված եմ, գիտակցում են նաև, որ Թուրքիայի ախորժակը չի սահմանափակվում Անդրկովկասով։ Ուրախալի է, որ հայկական կողմը զսպվածությամբ է մոտենում թուրք-ադրբեջանական այս և նման խաղերին»: