Ղարաբաղյան հակամարտության գոտում խաղաղապահների տեղակայումը ընդունելի է հայկական կողմի համար, և այդ ուժերը կարող են լինել ռուսաստանյան խաղաղապահները՝ ռուսական «Ինտերֆաքս»-ին տված հարցազրույցում երեկ հայտարարել է վարչապետ Նիկոլ Փաշինյանը։
«Ես կարող եմ ասել, որ Ադրբեջանի պատկերացումները խաղաղապահների կազմի մասին չեն համընկնում հայկական կողմի պատկերացումների հետ։ Եթե խոսում ենք փոխզիջումների մասին, այստեղ ևս փոխզիջումային տարբերակ կարող է դառնալ ռուս խաղաղապահների ներկայությունը։ Ռուսաստանը լավ հարաբերություններ ունի և՛ Ադրբեջանի, և՛ Հայաստանի հետ։ Շատ կարևոր է հաշվի առնել նաև տարածաշրջանի մյուս պետությունների կարծիքը, կարևոր է, որ խաղաղապահ ուժերը կայունացնեն տարածաշրջանը, ոչ թե հակառակը»,- ասել է Հայաստանի վարչապետը ռուսական գործակալությանը։
Գլոբալիզացիայի և տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանի կարծիքով՝ վարչապետի դիրքորոշումը ճիշտ է: «Նիկոլ Փաշինյանը փաստորեն նշում է՝ մենք դեմ չենք, մենք համաձայն ենք Մինսկի խմբի շրջանակներում քննարկել խաղաղապահների հարցը։ Նույնիսկ ՄԱԿ-ի Անվտանգության խորհրդում Ռուսաստանն այդ հարցը դրեց, ու ես ինչքան հասկացա՝ բոլորը համաձայնեցին ՄԱԿ-ի Անվտանգության խորհրդում այդ հարցը շոշափել։ Ու այստեղ ոչ միայն Ռուսաստանի խաղաղապահների մասին է խոսքը, այլև ընդհանուր առմամբ։ Ակնհայտ է, որ այնտեղ կան քննարկումներ, ու իմ կարծիքով՝ նաև անհամաձայնություններ, հակառակ դեպքում ՄԱԿ-ի Անվտանգության խորհուրդը կհրապարակեր իր հայտարարությունը։ Շատերը չգիտեն, որ ՄԱԿ-ի Անվտանգության խորհրդի վերջին նիստում դեռ հայտարարություն չի համաձայնեցվել։ Ինչի՞ հետ է դա կապված, կասկած չունեմ՝ որոշ նյուանսների։ Բոլորը հասկանում են, որ խաղաղապահներ մտցնելը միգուցե դադարեցնի պատերազմական գործողությունները։ Դա է պատճառը, որ Ռուսաստանի այդ առաջարկն ընդհանուր առմամբ դրական է։ Իմ կարծիքով՝ Նիկոլ Փաշինյանի քաղաքականությունը ճիշտ է, Հայաստանը չի ասում՝ ոչ, ասում է՝ եկեք քննարկենք Մինսկի խմբի շրջանակներում»,- «Առաջին լրատվական»-ի հետ զրույցում ասաց նա։
Մեր զրուցակցի կարծիքով՝ կա նաև մեկ այլ խնդիր. «Լավ, ենթադրենք՝ համաձայնեցինք խաղաղապահ զորքեր տեղակայելուն՝ ռուսական կամ ինտերնացիոնալ։ Որտե՞ղ են տեղակայվելու։ Այսօրվա շփման գծո՞ւմ։ Պատերազմը այսօր շարունակվում է, բայց մեծ շարժումներ կարծես չկան, կա ինչ-որ շփման գիծ, այդ շփման գծո՞վ պետք է կանգնել, թե՞ այլ։ Ռուսական խաղաղապահ ուժերի տեղակայման հետ կապված նկատի է առնվում հետևյալը՝ դրանք կլինեին ԼՂԻՄ-ի սահմաններով, որոնք կային այն ժամանակ, թե՞ այսօրվա ռեալ շփման գծով։ Ես ինչքան հասկանում եմ՝ Ռուսաստանը նկատի ունի ինքնավար մարզի, քանի որ Լավրովի պլանով պլանավորվում է հինգ շրջան վերադարձնել։ Մեզ համար դա անընդունելի է, քանի որ անվտանգության գոտի է։ Մյուս կողմից էլ՝ ես կարծում եմ, որ մյուս երկրներն այլ կարծիք ունեն, հակառակ դեպքում ՄԱԿ-ի Անվտանգության խորհրդի հայտարարությունը մենք կլսեինք։ Բայց ցանկացած դեպքում Նիկոլ Փաշինյանի քաղաքականությունը ճիշտ է՝ այն իմաստով, որ մենք պատրաստ ենք ցանկացած հարց քննարկել, այդ թվում՝ խաղաղապահների»,- եզրափակեց նա։