ԱԺ «Իմ քայլը» խմբակցության պատգամավոր Գայանե Աբրահամյանը Արցախում է տարբեր աջակցության ծրագրերով՝ և՛ քաղաքական, և՛ սոցիալական, և՛ տնտեսական. «Հիմնականում մարդկանց հետ շփումներն են՝ փորձելու հասկանալ նրանց կարիքները: Կարծում եմ՝ շատ կարևոր է տեղում տեսնելը, տեղում ամեն ինչ գնահատելը, նաև էմոցիոնալ տարածքում, որպեսզի մարդիկ չունենան մենակ լինելու զգացողություն»:
Խոսելով ԱՄՆ պետքարտուղար Մայք Պոմպեոյի հետ ՀՀ ԱԳ նախարար Զոհրաբ Մնացականյանի հանդիպման ակնկալիքների մասին՝ Գայանե Աբրահամյանը «Առաջին լրատվական»-ի հետ զրույցում ասաց. «ԱՄՆ-ի ներգրավվածությունը չափազանց կարևոր է հատկապես Թուրքիայի վրա որևէ կերպ ճնշում գործադրելու առումով, որովհետև այսօր ամենամեծ խնդիրը Թուրքիայի ներգրավվածությունն է: Եվ սա խնդիր է ոչ միայն Հայաստանի համար, այլև ամբողջ տարածաշրջանի: Մեծ հաշվով Թուրքիան և Ադրբեջանը հստակ հաշվարկել էին այս գործողությունը և այս պատերազմը սանձազերծելուց առաջ այն իրավիճակը, որ Ամերիկայում է տիրում. նախընտրական շրջան է, և բարդ է մարդկանց կենտրոնացնել այլ տարածաշրջանում, թեկուզ աննախադեպ, պատերազմական գործողությունների վրա»:
Պատգամավորի խոսքով՝ շատ կարևոր էր, որ արցախյան հարցը դառնա ամերիկյան քաղաքական օրակարգի մի մաս. «Եվ ես վստահ եմ, որ այս ներգրավվածությամբ որևէ կերպ որևէ բեկում հնարավոր է մտցնել»:
«Աշխարհաքաղաքական բոլոր դերակատարները տեսնում են, որ այս տարածաշրջանում դեստրուկտիվ են Թուրքիան ու Ադրբեջանը, և նրանց որևէ կերպ պետք է սաստել ու այս սանձարձակ պատերազմը դադարեցնել»,- նշեց մեր զրուցակիցը՝ անդրադառնալով վարչապետի հղած ուղերձներին, մասնավորապես Արցախում խաղաղապահներ տեղակայելու պատրաստակամությանը:
Մանրամասն՝ տեսանյութում: