| «Ողջունում եմ վարչապետին, որն իր ուղերձներում միջազգային ամբիոններում պահում է «հող չունենք հանձնելու» կարգախոսը։ Մենք պատրաստ ենք պաշտպանվել ու առաջ գնալ»,- «Առաջին լրատվական»-ի հետ զրույցում ասաց «Կոռնիձոր» ջոկատի հրամանատար Արա Խուդավերդյանը՝ Կոռնիձորցի Արոն։ Վերջինս ողջունում է նաև վարչապետի ջոկատներ կազմելու և ռազմաճակատ մեկնելու կոչը, բայց հավելում է, որ, դրան էլ գումարած՝ մեզ հրթիռներ են հարկավոր, որպեսզի կարողանանք խոցել հակառակորդի թիրախները։ «Մեզ շատ հրթիռներ են պետք, որ խոցենք հակառակորդի այն արգելված զինատեսակները, որոնք ամեն օր մեր զավտրիկի, աբեդի ու ուժինի մեջ կան»,- ասաց Խուդավերդյանը։
Նրա խոսքերով՝ երբ հակառակորդը լարված է պահում իրավիճակը, իրենք դիմադրում են, իսկ երբ հանդարտվում է, դա նշանակում է, որ իրենք պատրաստվում են հերթական նենգ գործողության։ «Հիմա նորմալ է վիճակը, այնպես է, ինչպես կար։ Մենք այս վիճակը կտեսնենք, քանի դեռ չի եղել այն, ինչին սպասում ենք»,- ասաց Խուդավերդյանը։ Մեր դիտարկմանը՝ իրենք ինչի՞ են սպասում, արդյոք, որ դիվանագիտական հարթակում հաջողություններ լինեն ու զինադադար լինի, մեր զրուցակիցը պատասխանեց. «Դիվանագիտական հարթակը դարձել է ոտք սրբելու տրյապկա։ Միայն մեր հաղթանակից է կախված ամեն ինչ։ Մեր հաղթանակից հետո գլոբալիզմը կապրի իր վախճանը։ Չեն լինի տարերային կամ նենգաբարո պրոցեսներ։ Մի ամբողջ հայ ժողովուրդ դրան պետք է պատրաստվի։ Անի ու ներդնի ամեն ինչ սեփական հարկի տակ սեփական գոյի պահպանման համար, որ չդառնա թափառական երաժիշտ»։ |
Մեր զրուցակիցը նշեց, որ արդեն ակնհայտ է, որ հակառակորդը հյուծվում է, մարդկային ռեսուրսի լուրջ խնդիր ունի, բայց, ի տարբերություն մեզ, կարողանում է նոր վարձկաննր ներգրավել, որոնք իրենց համար զոհ չեն հաշվում։ «Մեր մեկը, նրանց հազարն է։ Մեր մեկը երևում է, իսկ նրանց հազարը չի երևում։ Նա ամենօրյա ռեսուրսի կորուստ ունի՝ մարդկային, տեխնիկայի, զինտեխնիկայի։ Դա ակնհայտ է։ Պարզապես հիմա հակառակորդի տեխնիկան կռվում է մեր ֆիզիկական անձի դեմ։ Բայց հայը պատրաստ է կանգնել մինչև վերջ։ Պետք է աշխատել ռազմամթերքի հզորացման, գերհզորացման վրա ու միանգամից խեղդել հակառակորդին իր որջում։ Հիմա էլ կան կրակոցներ, ԱԹՍ-ներ, կամիկաձեներ, հրթիռներ, գնդակոծություններ, բայց մենք դրանց հանգիստ ընդունում ենք ու ճանապարհ ենք դնում»,-եզրափակեց Արա Խուդավերդյանը։
