Պատերազմի առաջին օրվանից սկսած՝ Ադրբեջանը թիրախավորում է թե՛ Արցախի, թե՛ Հայաստանի խաղաղ բնակավայրերը, խաղաղ բնակչության համար կենսական նշանակություն ունեցող ենթակառուցվածքները: Հատկապես Արցախում զանգվածային ավերածություններ են պատճառվել, կան սպանվածներ և վիրավորում ստացած քաղաքացիներ: Այս մասին «Առաջին լրատվական»-ի հետ զրույցում ասաց ՀՀ Մարդու իրավունքների պաշտպան Արման Թաթոյանը:
ՄԻՊ-ի խոսքով՝ միջազգային կառույցների արձագանքը համաչափ չէ: «Սա կոչերով ու գեղեցիկ խոսքերով առաջնորդվելու ժամանակաշրջան չէ, այլ իրական քայլեր անելու: Պետք է ճշգրիտ փաստագրենք և փաստերը ճշգրիտ որակումներով ներկայացնենք միջազգային կառույցներին, որպեսզի կարողանանք ակնկալիքներ ունենալ,- ասաց ՄԻՊ-ը:
Նա նաև հավելեց, որ աշխատանքային մի քանի խմբեր են ձևավորվել: «Խմբերից մեկը փաստահավաք աշխատանքներ է իրականացնում, մեկ այլ խումբ նյութերն է պատրաստում, ձևակերպումները տարբեր լեզուներով թարգմանում, որոնք ուղարկվում են միջազգային կառույցներին, մյուս խումբը մոնիթորինգի է ենթարկում լրատվամիջոցները, սոցիալական ցանցերը, ընդ որում՝ ոչ միայն հայաստանյան: Խմբերից մեկն էլ աշխատում է ադրբեջանական զինված հարձակումների պատճառով Հայաստան տեղափոխված մարդկանց՝ կանանց, երեխաներին, տարեցներին, այդ խմբում կան բժիշկներ, հոգեբաններ, իրավաբաններ»,-ասաց ՄԻՊ-ը:
Մանրամասն՝ տեսանյութում: