Ադրբեջանական 1news.az-ի փոխանցմամբ՝ Ադրբեջանի անկախության 20-ամյակին նվիրված The Business Year» – The Business Year – Azerbaijan 2011 պարբերականի հատուկ համարին տված հարցազրույցի ժամանակ Վրաստանի նախագահ Միխեիլ Սաակաշվիլին անդրադարձել է վրաց-ադրբեջանական հարաբերություններին.
«Վրաստանն ու Ադրբեջանը պետք է կողք կողքի կանգնած լինեն՝ ուշադրություն դարձնելով իրենց աշխարհագրական դիրքի և ընդհանուր պատմության վրա։ Մենք ունենք ընդհանուր հայացքներ և ամուր կապեր։ Ես վստահ եմ, որ մեր միասնության ու լավ հարաբերությունների շնորհիվ մեր երկրները կարող են ավելի լավ ապագա ունենալ։
Երկու երկրներն էլ լուրջ խնդիրներ ունեն՝ կապված չլուծված հակամարտությունների հետ։ Ադրբեջանի ու Վրաստանի ցանկացած ընդդիմախոս մեր երկու երկրների թշնամին է (այս կապակցությամբ ռուսական Regnum գործակալությունը գրել է, որ Սաակաշվիլին Հայաստանին ներառել է Վրաստանի թշնամիների թվում – 1in.am)։ Մեր ուժը միասնության մեջ է, և դրանք պարզապես խոսքեր չեն, դա իրողություն է։
Նրանք, ովքեր ձգտում են խաթարել Ադրբեջանի ու Վրաստանի միջև միասնությունը, հանդես են գալիս երկու երկրների ազգային շահերի դեմ, որոնք ամրագրված են երկկողմանի ռազմավարական գործընկերությամբ»։
Սաակաշվիլին խոսել է նաև հաջողությամբ իրականացված
համատեղ նախագծերից՝ այդ պլանում ընդգծելով «Բաքու-Թբիլիսի-Կարս» (ԲԹԿ) երկաթգծի կառուցման կարևորությունը. «ԲԹԿ-ի միջոցով ոչ միայն նոր ռազմավարական կապ է ստեղծվում Վրաստանի, Ադրբեջանի ու Թուրքիայի միջև, այլև՝ Չինաստանի, Կենտրոնական Ասիայի ու Եվրոպայի միջև։ Ըստ էության, ԲԹԿ-ն «Մետաքսե ճանապարհի» ժամանակակից տարբերակն է»։
Սաակաշվիլին հավելել է, որ վրաց-ադրբեջանական բարեկամությունն ունի մեծ պատմություն և անցել է լուրջ փորձությունների միջով. «Ինձ դեռևս անհայտ պատճառներով Վրաստանը 2008 թվականի հունվարին մնացել էր առանց էլեկտրաէներգիայի ու գազի։ Ադրբեջանը տվյալ խիստ ձմռանն օգնության ձեռք է մեկնել՝ անգամ չնայելով նրան, որ դրա համար ստիպված է եղել կրճատելու սեփական բնակչությանը հատկացվող գազի ծավալը։
Վրաստանը երբեք չի մոռանա ադրբեջանական ժողովրդի այդ օգնության մասին։ Եվ դա ոչ միայն մեր ռազմավարական գործընկերության արդյունքն է, այլև խորհրդանշում է մեր եղբայրությունը։ Ըստ էության, մենք կոնֆեերատիվ կապեր ենք ստեղծել։ Մեր երկրների միջև «որևէ խնդիր» գոյություն չունի»։