Լուրեր
Թշնամին ուզում է Լաչին հասնել, բայց թույլ չենք տա․ Կոմանդոս

Այսօրվանից բեկում է մտնելու մարտի դաշտում: Նոր համալրումներ ունենք, շուտով հաջողությունների մասին եք լսելու: Այս մասին հայտարարել է ՀՀ ԶՈւ գեներալ-մայոր Արկադի Տեր-Թադևոսյանը՝ Կոմանդոսը:

«Մենք 24 օր դիմակայել ենք Թուրքիայի և Ադրբեջանի ագրեսիային: Մենք հաշվարկել էինք, որ մեր թշնամին Ադրբեջանն է, մեր պաշարները, զենք-զինամթերքը, ամեն ինչը այդ առումով բավարար էին: Մենք կռիվ չէինք ուզում: Հայաստանը միշտ խաղաղության ճանապարհով է գնացել, չէինք ուզում հարձակվել: «Առաջին լրատվական»-ի հետ զրույցում այս մասին ասաց Արկադի Տեր-Թադևոսյանը:

Նրա խոսքով՝ Ադրբեջանը Հայաստանի դեմ երբեք մենակ չի կռվել, ու այս պատերազմում ոչ միայն Ադրբեջանն է, այլ ներգրավված է նաև Թուրքիան, վարձկանները, և մենք մեծ կորուստներ ունեցանք՝ թե՛ մարդկային, թե՛ զինտեխնիկայի: «Բայց մեր ռեսուրսները վերականգնվել են, համալրվել են, բավարար են»,- վստահեցրեց մեր զրուցակիցը:

Կոմանդոսի խոսքով՝ մարտի դաշտում իրականացվում է նաև նահանջի մարտավարություն, որով շրջափակման մեջ է հայտնվում թշնամին. «Դա ցույց է տալիս մեր հերոսների, մեր հրամանատարների, սպաների ճիշտ մարտավարությունը: Բայց հիմա ուռա-ուռայի ժամանակը չէ»:

Արկադի Տեր-Թադևոսյանի կարծիքով՝ զինադադարը Ալիևից կախված չէ. «Էրդողանը չի թողնում, որ զինադադար հաստատվի, բայց հիմա Ադրբեջանի համար դժվար վիճակ է ստեղծվել, և դա կստիպի խոսել զինադադարի մասին»: Կոմանդոսի դիտարկմամբ՝ եթե այսօր զինադադար հաստատվի, հայկական կողմի համար շահեկան կլինի. «Մեզ ձեռնտու կլինի. դա մեր հաղթանակը կլինի»:

Անդրադառնալով հակառակորդի վերջին օրերի ռազմական գործողությունների մարտավարությանը և նպատակներին՝ Արկադի Տեր-Թադևոսյանը նշեց. «Ուզում են Լաչին հասնել, դա մեզ համար «կյանքի ուղի» է, ո՞վ կթողնի, որ հասնեն, թույլ չենք տա»:

Մանրամասն՝ տեսանյութում:

  • Դիտումներ՝ *