Մենք մղում ենք նորանկախ Հայաստանի պատմության ամենավճռորոշ պատերազմը: Վճռորոշ է, որովհետև, համոզված եմ, վերջինն է: Այս մասին «Առաջին լրատվական»-ի հետ զրույցում ասաց դերասանուհի, Հայաստանի վաստակավոր արտիստուհի Լալա Մնացականյանը:
«Դադեր շարունակ մենք մտածել ենք, որ մեր հարցերը մեր փոխարեն կլուծեն ուրիշները և վճռականությանը տեր չենք եղել: Հիմա մենք մեր վճռականությանը պետք է տեր կանգնենք: Պետք է այնպիսի լուծում տանք, որ դրանից հետո մեր ժողովուրդը հայտնվի այլ հարթության վրա: Եթե մենք, որպես ժողովուրդ, հիմա չկայանանք, մեր հետագա սերունդների վրա կդնենք այդ խնդիրը լուծելու բեռը: Ես չեմ պատրաստվում այդ բեռը դնել իմ երեխայի, իմ թոռան վրա, պատրաստ եմ անել ամեն հնարավորը և անկարելին»,- ասաց դերասանուհին:
Երևանի տիկնիկային թատրոնի տնօրեն Ռուբեն Բաբայանը հավելեց, որ պարտավորություն ունենք գալիք սերունդների հանդեպ՝ թողնել խաղաղ ապրելու հնարավորություն, և պետք է ամեն ինչ անենք դրա համար:
«Մեր սխալներից մեկը գուցե եղել է այն, որ զինադադարը ընկալել ենք որպես պատերազմի ավարտ: Բայց պատերազմը շարունակվում է, նույնիսկ երբ չեն կրակում, պարզապես տեղափոխվում է ուրիշ դաշտ: Գուցե հենց այսօր ենք կերտում մեր խաղաղ ապագայի համար ամենակարևորը՝ պետականություն կառուցելը, իսկ դա ոչ միայն ամուր բանակն է, այլ նաև ամուր տնտեսությունն է, զարգացած կրթությունը, գիտությունը, մշակույթը: Ես համոզված եմ, որ հաղթելու ենք, և ես հաղթանակը չեմ դիտում միայն ռազմի դաշտում, այլ նաև ամուր պետականություն կառուցելու գործում: Մեզ անհրաժեշտ է նաև ճկուն դիվանագիտություն: Եվ ամուր թիկունքն է ապահովում հաջողությունները թե՛ ռազմադաշտում և թե՛ դիվանագիտական դաշտում»,- ասաց Բաբայանը:
Լալա Մնացականյանը նույնպես կարևորեց թիկունքի ամրության և միասնականության դերը: Նրա խոսքով՝ ամեն նվոցը գնդակ է՝ թիկունքից ուղղված զինվորին: «Զինվորը էներգետիկ դաշտով կարող է զգալ, որ իր թիկունքն ամուր է: Այդ էներգետիկ դաշտը հեշտ է խարխլելը, դրա համար պետք է անգամ աննշան վհատություն ու հուսահատություն չունենալ, դա մեզ կարող է կործանել, մենք միշտ պետք է մտածենք, որ մեր զինվորը հաղթելու է և առողջ վերադառնալու է տուն»:
Մանրամասն՝ տեսանյութում: