Դեկտեմբերի 1-ից արգելվում է ոչ թե Թուրքիայից ապրանքի ներմուծումը, այլ թուրքական ծագում ունեցող ապրանքների ներմուծումը: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արտակ Մանուկյանը:
Նրա խոսքով, եթե անգամ դուք ապրանքը ներմուծեք Վրաստանից, բայց նա թուրքական ծագում ունենա, դրա ներմուծումը արգելվելու է. «Ընդունում ենք, որ սա կարճաժամկետ առումով իսկապես ռիսկեր է ստեղծում, բայց չմոռանանք, թե ինչ երկրի մասին ենք խոսում: Խոսում ենք մի երկրի մասին, որը հայկական ծագմամբ որևէ ապրանք չի ընդունում: Թուրքիայի վիճակագրությունը չի ճանաչում հայկական ապրանք: Մեր արտահանման շուկան այդ մասով կտրված է: Մենք խոսում ենք մի երկրի մասին, որը մեր տնտեսությունից գեներացված միջոցներով զենք է գնում և դա մեր նույն տնտեսվարողների հարազատների, բարեկամների դեմ է օգտագործվում: Հետևաբար, եթե դիտարկում ենք, որ տնտեսական առումով ռիսկեր կան, ապա քաղաքական ու ազգային անվտանգության տեսանկյունից այս մոտեցումն արդարացված է»,-ասաց նա:
