Դիվանագիտական լուծում գտնելու բոլոր հույսերն այս փուլում պետք է համարել ավարտված, հայտարարել է վարչապետ Նիկոլ Փաշինյանը հանրության հետ ֆեյսբուքյան ուղիղ եթերում շփման ընթացքում: Նա նշել է, որ չնայած հայկական կողմի փոխզիջումային պատրաստակամությանը, Ադրբեջանը պատրաստ չէ փոխզիջման: Դա, իհարկե, նշանակում է դիվանագիտական անելանելիություն, սակայն որոշակի առումով, որովհետև տվյալ պարագայում դիվանագիտական լուծում ասվածը լոկ Հայաստանի և Ադրբեջանի համաձայնությունը չէ: Բանն այն է, որ նույն կերպ դիվանագիտական լուծում է Արցախի անկախության միջազգային ճանաչումը: Այլ հարց է, որ դա լուծում է արդեն ոչ թե հայ-ադրբեջանական ձևաչափով, այլ բոլորովին ուրիշ՝ միջազգային ձևաչափով: Սակայն, միևնույն է, դա լուծում է: Այդ լուծումը փաստացի ունի երկու մեխանիզմ՝ ռազմական և քաղաքական: Այսինքն՝ այդ լուծման հնարավորությունը մեծացնելու, լուծումն ավելի ու ավելի հավանական դարձնելու համար պետք է ամուր լինի հայկական բանակն ու հայկական դիմադրության համակարգը ընդհանրապես:
Վարչապետ Փաշինյանի ուղիղ եթերն այդ իմաստով, անշուշտ, նվազագույնն է, որ անհրաժեշտ է հայկական դիմադրության համակարգի տեսանկյունից: Այսինքն՝ գերագույն գլխավոր հրամանատարի ազդակներ թե՛ սեփական հանրությանը, թե՛ առավել ևս միջազգային հանրությանը, որ այս պատերազմում Հայաստանը թույլ օղակ չէ և մտադիր չէ լինել թույլ օղակ, որը կարող է առաջացնել քաղաքական ճնշումները այդ օղակի վրա դնելու գայթակղություն: Մեծ հաշվով, անշուշտ, տևական և հոգեմաշ պատերազմի պատրաստ լինելու հրամայականով հանդերձ, թերևս նկատելի է և այն, որ, այդուհանդերձ, գործ ունենք որոշակիորեն ոչ շատ երկար և մեծ ժամանակային հեռանկարով պատերազմական ռեսուրսի հետ, և զուգահեռ, առավել արագ զարգացող քաղաքական գործընթացի հետ, որտեղ արդեն շատ կարևոր է դառնում հենց վճռականությունն ու տևականության պատրաստակամությունը՝ հոգեբանորեն, կամքով և ռեսուրսային հաշվարկներով: Այդ իմաստով, ռազմաճակատի թեժ մարտերին զուգահեռ, թևակոխում ենք նյարդերի և հոգեբանության թեժ մարտերի փուլ, որը մեզ պետք է քաղաքական-դիվանագիտական ուղղությամբ լուծման հնարավոր տարբերակն առաջ մղելու համար՝ Արցախի ճանաչում միջազգային ասպարեզում, որն այս պահին գործնականում միակ դիվանագիտական լուծումն է:
