Պարսից ծոցի տարածաշրջանը գտնվում է ապակայունացման վտանգավոր միտումների ազդեցության տակ, և ՄԱԿ-ի Անվտանգության խորհուրդը պետք է անընդհատ վերահսկի իրավիճակը: Այս մասին երեքշաբթի օրը հայտարարել է Արտաքին գործերի նախարար Սերգեյ Լավրովը՝ ելույթ ունենալով ՄԱԿ-ի Անվտանգության խորհրդում՝ Պարսից ծոցի տարածաշրջանում իրավիճակի վերաբերյալ տեսակոնֆերանսի ձևաչափով բարձր մակարդակի բանավեճում:
«Այսօրվա հանդիպումը կազմակերպելիս մենք ելել ենք այն իրողությունից, որ Պարսից ծոցի տարածաշրջանում անդորր ապահովելը կարևոր և հրատապ խնդիր է ամբողջ միջազգային հանրության համար: Այս գոտու անառողջ իրավիճակն ապակայունացնող ազդեցություն է թողնում միջազգային հարաբերությունների վրա: Դրանից ելնելով՝ մենք կարծում ենք, որ հարցը պետք է մշտապես գտնվի Անվտանգության խորհրդի [ՄԱԿ] մշտական ուշադրության կենտրոնում, որը պատասխանատու է միջազգային խաղաղության և անվտանգության պահպանման համար», – ասել է նախարարը:
Ռուսական կողմը, որի նախաձեռնությամբ հրավիրվել է այս հանդիպումը, մասնակիցներին հրավիրել է՝ համատեղ քննարկելու «իրավիճակը վտանգավոր գծից շեղելուն և տարածաշրջանի երկարաժամկետ կայունացմանը» միտված հատուկ միջոցառումները: Լավրովի խոսքով՝ չնայած այն հանգամանքին, որ տարեսկզբին տարածաշրջանում լայնամասշտաբ պատերազմի հնարավոր մեկնարկի մասին վախերը չհաստատվեցին, Մոսկվան ինքնագոհության պատճառ չի տեսնում: «Իրավիճակը դեռ անորոշ է, և ցանկացած պահի կարող են ծավալվել վտանգավոր և անկանխատեսելի սցենարներ», – ասել է նա:
