Արցախի կենտրոնական շուկայում ամենահամով ժենգյալով հաց թխող տիկին Արմինեն ժամանակավորապես իր աշխատանքի տեղը փոխել է։ Արդեն 3 օր է նույն համեղ ժենգյալով հացերը թխում է արդեն Երևանի Աբովյան փողոցում, օրը 200 հատ։ Ամբողջ հասույթն էլ փոխանցում է Հայաստան համահայկական հիմնադրամին։ Մեր նկարահանման պահին Ժենգյալով հաց գնելու համար մեծ հերթ էր գոյացել։ Մարդիկ գնում էին հացը, նախ որ սիրում են, ապա որ ամբողջ հասույթը փոխանցվելու է հիմնադրամին։
Տիկին Արմինեն երեք օր առաջ էր տեղափոխվել Երևան, երբ հասկացել է, որ արդեն ապաստարանում էլ անվտանգ չէ։ Սահմանին կռիվ տվող տղան է հորդորել դուրս գալ Ստեփանակերտից։ Եկել է, բայց սրտով, մտքով ու հոգով Արցախում է։ «Հենց պատերազմը ավարտվի, երկու օր էլ խաղաղության համար Երևանում ժենգյալով հաց կթխեմ ու անմիջապես կգնամ Արցախ։ Տունս ավիրված է, բայց մեկ օր էլ չեմ մնա, հաջորդ օրը կգնամ ու նորից տունս կսարքեմ, էլի Ստեփանակերտի կենտրոնական շուկայում ժենգյալով հաց կթխեմ, թե խաղաղություն լինի»,-«Առաջին լրատվական»-ին ասաց տիկին Արմինեն։
Առավել մանրամասն՝ տեսանյութում։
