«Առաջին լրատվական»-ի զրուցակիցն է պաշտպանության նախկին փոխնախարար, գեներալ Գագիկ Մելքոնյանը։
– Պարոն Մելքոնյան, համացանցում նահանջային տրամադրություններ են, նվնվոց է, քանի որ Դուք հենց այս պահին առաջնագծում եք, կասեք՝ ի՞նչ է կատարվում իրականում:
– Մենք ոնց կանգնած ենք առաջին օրվանից մեր դիրքերում, հիմա էլ կանգնած ենք նույն տեղում։ Մեր մոտ ոչ մի առաջխաղացում չկա։ Մնացած տեղերի վերաբերյալ ինֆորմացիա չկա։ Բայց ես մի բան գիտեմ, որ պատերազմ է ու պատերազմի ժամանակ հնարավոր է դիրքերը փոփոխվեն, հնարավոր է տակտիկական խաղ լինի հակառակորդին ծուղակը գցելու համար։ Կարող ենք տարածքները թողնենք, իրենք ընդարձակվեն ու հետո հակառակ գործողություն լինի։ Պատերազմ է ու բոլորս պետք է կռվենք։ Եթե ասում ենք, որ հաղթելու ենք, ապա բոլորս պետք է պատրաստ լինեն կռվելու։ Ես կոչ եմ անում իմ բոլոր զինակից ընկերներին, բոլորին, ովքեր պատերազմը անցել են ու հիմա հնարավորություն ունեն կանգնելու և պաշտպանելու մեր հայրենիքը, ապա պետք է գան ու մեր կողքը կանգնեն։ Եթե առաջին պատերազմը հաղթել ենք, ապա պարտավոր ենք այս մեկն էլ հաղթահարել։ Դրա համար կոչ եմ անում բոլոր կռված տղաներին գալ ու կանգնել մեր, զինվորների կողքին։
Չնայած զինվորների դուխն այսօր այնքան բարձր է, որ նույնիսկ իրենք աշխարհազորայիններին են դուխ տալիս։ Մենք բոլորս իրար կողք կանգնած միայն մի բան պետք է մտածենք՝ հայրենիքը իրավունք չունենք կորցնելու։
– Վարչապետի գլխավոր խորհրդական Վաղարշակ Հարությունյանն ասել է, որ խաղաղության գինը երկարատև պատերազմն է։ Պետք է պատրաստվենք երկարատև պատերազմի՞։
– Իհարկե, պետք է պատրաստ լինենք։ Ոչ մեկ նախապես չի որոշում, թե պատերազմը քանի օր պետք է տևի՝ 5 օր, 20 օր կամ մեկ ամիս։ Այսօր պատերազմի մեջ ենք ու պետք է կռվենք։
Պարտիզանական կռիվներ էլ ենք անելու, ամեն ինչ անելու ենք, որ կարողանանք ամեն ինչ իր տեղը դնենք։ Այո՛, պետք է պատրաստ լինենք երկարատև պատերազմի։
– Ե՛վ վարչապետ Նիկոլ Փաշինյանը, և՛ Իլհամ Ալիևը ՏԱՍՍ գործակալությանը տված հարցազրույցում ասել են, որ պատրաստ են նստել բանակցությունների։ Ի՞նչ եք սպասում այդ հանդիպումից, և եթե առաջիկա օրերին զինադադար կնքվի, դիրքային առումով դա մեզ ձեռնտո՞ւ է։
– Նախ՝ հանդիպում չի կայանա։ Ալիևը խաբեբա, ստախոս մարդ է։ Արդեն երկու անգամ իրենք խաբել են։ Մենք իրավունք չունենք հավատալու դրանց նման ստորներին։ Մենք չպետք ա իրենց հավատանք, սպասենք զինադադարի և այլն։ Մենք կռվել ենք ու պետք է կռվենք մինչև վերջ։
