Էկոնոմիկայի նախարարությունն առաջարկում է ժամանակավորապես արգելել դեպի Հայաստան թուրքական ծագման ապրանքների ներկրումը։ Նախագիծն արդեն հանրային քննարկման է դրվել, և այն հաստատվելու դեպքում ուժի մեջ կմտնի դեկտեմբերի 31-ից։
Ինչո՞ւ հիմա, ինչո՞ւ ավելի վաղ այս հարցի շուրջ հանրային քննարկում չէր լինում․ «Առաջին լրատվական»-ի հարցին «Էքսպորտ Արմենիա» փորձագետների ասոցիացիայի համահիմնադիր Էմիլ Ստեփանյանը պատասխանեց․ «Գիտեք՝ մինչև բուն որոշման ընդունումը այս խոսակցությունները գնում էին։ Երկու կարծիք էր բախվում։ Մեկը, որ մենք իրավունք չունենք, այսպես կոչված, թշնամական երկրից գնենք արտադրանք և օգուտ տանք նրանց։ Իսկ երկրորդ կողմն ասում էր, որ պետք է ամեն ինչ անել, այսպես ասած, մտածված, կամաց-կամաց, որպեսզի շոկի չենթարկեն Հայաստանի տնտեսությունը, որովհետև ամբողջ մեր ներմուծման 5 տոկոսը թուրքական արտադրանք է։ Ընդ որում՝ 5 տոկոսը, դա միջին թիվ է, կան ապրանքատեսակներ, որոնք ավելի մեծ մասնաբաժին են կազմում, օրինակ՝ հագուստի մեջ այն կազմում է 30 տոկոս, կտորեղենի՝ 60-70 տոկոսը։ Թեպետ ասեմ, որ 5 տոկոսն արդեն իսկ զգալի է։ Քանի որ ունենք նման պատկեր, որոշ մարդկանց կարծիքով՝ միանգամից արգելելը կարող է բացասական հետևանքներ առաջացնել Հայաստանի համար։
Իսկ ինչո՞ւ հիմա։ Հիմա էլ մտավախությունը կա, սակայն այսօր Թուրքիան ու թուրքական արտադրանքը հավասարվել է ադրբեջանականին։ Թուրքիայի բացահայտ մասնակցությունն այս պատերազմին մեզ հուշում է, որ թուրքականը, դա նույն ադրբեջանականն է։ Եվ ինչպես մենք առանց քննարկման արգելել ենք ադրբեջանական արտադրանքի մուտքը, այսօր եկել է ժամանակը, որ նույն կերպ վերաբերվենք թուրքականին։ Այսինքն՝ երբ արդեն թուրքականը համարվում է ադրբեջանականին հավասար, ուրեմն բոլոր հարցերը դուրս են գալիս ու քննարկման ենթակա չեն»։
Մանրամասները՝ տեսանյութում։
