Իրանի և Ադրբեջանի արտգործնախարարներ Մոհամմադ Ջավադ Զարիֆը և Ջեյհուն Բայրամովը քննարկել են իրավիճակը ղարաբաղյան հակամարտության գոտում:
Ինչպես հաղորդում է ԻՌՆԱ-ն, Զարիֆը հայտարարել է Լեռնային Ղարաբաղի հակամարտության խաղաղ և կայուն կարգավորմանը աջակցելու Իրանի պատրաստակամության մասին՝ «Իրան-Թուրքիա-Ռուսաստան տարածաշրջանային նախաձեռնության շրջանակներում՝ որպես Մինսկի խմբի մեխանիզմի լրացում»:
ՄԱՀՀԻ փորձագետ, իրանագետ Էմմա Բեգիջանյանի կարծիքով՝ Իրանի ԱԳ նախարարի առաջարկությունը Հայաստանի համար ընդունելի լինել չի կարող: «Նույնիսկ որպես ԵԱՀԿ Մինսկի խմբի ֆորմատին լրացնող մեխանիզմ այն մեզ համար ընդունելի չէ և չի գործի։ Թուրքիան նույն Ադրբեջանն է։ Հիմա երբ Ալիևը ասում է՝ հորս ճանապարհով եմ գնում, նա Թուրքիային առաջարկել է վերցնել այդ հանրապետությունն ու տնօրինել։ Իրանը իր ներքին խնդիրներով՝ Ադրբեջանի ու Թուրքիայի հուժկո պանթուրքիստական քարոզչության տակ մեծ խնդիր ունի: Երկրորդ՝ իսլամի գործոնը, Իրանը չի կարող իսլամական պետության շահերին դեմ քայլեր անել»,- «Առաջին լրատվական»-ի հետ զրույցում ասաց նա։
Մեր զրուցակցի կարծիքով՝ Ռուսաստանն էլ միշտ հավասարության նշան է դրել, ուստի այս ֆորմատը չի կարող աշխատել. «Իրանը պարզապես դուրս է մղվել այս գործընթացից ու ջանքեր է գործադրում։ Նույնիսկ իրանցի փորձագետներն են ասում՝ որպեսզի Իրանը դուրս չմնա, պետք է մշակված նախագիծ ներկայացնի։ Ըստ երևույթին՝ մշակված նախագիծը դա է։ Հիմա Թուրքիայի առաջարկով գնում է Սիրիայի տարբերակով հարցը լուծելուն։ Բայց դա, իմ կարծիքով, Հայաստանի համար ընդունելի չէ»։
Իրանագետի խոսքով՝ նման ձևաչափ Հայաստանին չի կարող պարտադրվել, դրան դեմ կլինեն նաև Միացյալ Նահանգներն ու Եվրամիությունը: «Միևնույն ժամանակ ուզում եմ շեշտել, որ Իրանը տարածաշրջանում, գուցե և ամբողջ աշխարհում միակ երկիրն է, որի շահերը համընկնում են մեր շահերի հետ։ Բայց Իրանը, ունենալով վերոհիշյալ խնդիրները, չի կարող հայանպաստ ու արդար լուծում տալ հարցին»,- եզրափակեց նա։
Իրանագետ Արմեն Վարդանյանն էլ «Առաջին լրատվական»-ի հետ զրույցում նշեց՝ պատերազմական գործողությունների ամենասկզբից էլ Իրանն ասել է, որ պատրաստ է ամեն կերպ նպաստել, որ Հայաստանն ու Ադրբեջանը նստեն բանակցությունների սեղանի շուրջ ու դադարեցնեն կրակը. «Նաև ասել է, որ կոնկրետ առաջարկություն ունի։ Բայց վերը նշվածը, իմ կարծիքով, հաջողություն չի ունենա։ Հայաստանի համար ԵԱՀԿ Մինսկի խմբի ֆորմատից դուրս մնացած բոլոր տարբերակներն անընդունելի են»։
Ըստ Վարդանյանի՝ այդ ֆորմատը չի կարող նաև որպես լրացում լինել ԵԱՀԿ Մինսկի խմբին. «Մանավանդ որ, ի տարբերություն Թուրքիայի, Իրանը նույնիսկ ԵԱՀԿ Մինսկի խմբի անդամ էլ չէ»։