Իրանական «Իռնա» գործակալությունը հայտնելով Իրանի արտգործնախարար Զարիֆի և Բաքվի արտգործնախարարի միջև տեղի ունեցած հեռախոսազրույցի մասին՝ արտահայտվել է Ռուսաստան-Իրան-Թուրքիա ձևաչափի օգտին՝ որպես Մինսկի խմբի եռանախագահության ձևաչափի լրացում: Իրանի արտգործնախարարի այդ հայտարարությունը անկասկած ակնարկ է, որ Թեհրանը թույլ չի տա որևէ գործընթացի Անկարայի ներգրավում, եթե դուրս է մնում ինքը: Իսկ այն, որ Անկարան, Բաքվի միջոցով շարունակելով պատերազմը, փորձում է լուծել հենց այդ՝ ձևաչափ ներգրավվելու և որոշումների կայացմանը որևէ մեկից ոչ պակաս մասնակցություն և դեր ունենալու հարցը՝ կասկածից վեր է: Թեհրանն ըստ էության զանգահարել է Բաքու զգուշացնելու՝ կա՛մ, Թուրքիայից բացի, կներգրավվի նաև ինքը, կա՛մ թույլ չի տա որևէ այլ կերպ Անկարայի մասնակցություն: Թե ինչպես թույլ չի տա Իրանը՝ սա արդեն թերևս հասկանալի կլինի Ադրբեջանին, որովհետև Բաքվում գուցե լավ են պատկերացնում, թե Իրանն ինչպիսի խնդիրներ կարող է առաջացնել Ադրբեջանի համար, ընդ որում՝ նաև ռազմական իմաստով:
Մյուս կողմից, սակայն, Իրանի արտգործնախարարի հայտարարությունը կարող է լինել ահազանգ, որ իսկապես կա քննարկում Թուրքիայի որևէ ներգրավման շուրջ պայմանավորվածության համար: Զարիֆի հայտարարությունը կարծես թե վկայում է, որ Թեհրանն առնվազն ունի այդ կապակցությամբ կասկածներ, եթե չասենք այն մասին, որ ունի տեղեկատվություն: Իրանը հաղորդակցության մեջ է ռուսական կողմի հետ՝ թե՛ նախագահի, թե՛ արտգործնախարարների մակարդակով, իսկ օրերս էլ Մոսկվայում Իրանի դեսպանը հանդիպել էր ՌԴ երկու փոխարտգործնախարարներին: Չի բացառվում, որ Մոսկվան Թեհրանին իրազեկել է կամ ներկայացրել տարբերակ՝ Մինսկի խմբի համանախագահության ձևաչափի, այսպես ասած, լրացման որևէ գաղափարի վերաբերյալ: Եթե Ռուսաստանը քննարկում է այդպիսի հարց Անկարայի հետ՝ հրադադարի հասնելու համար, ապա թերևս դեմ չի լինի Թեհրանի ներգրավվածությանը՝ Թուրքիայի դեմ մենակ չմնալու համար:
Բայց նախ՝ դա նշանակելու է Ռուսաստանի հերթական ռազմավարական պարտությունը Անկարային: Մյուս կողմից՝ Անկարան ու Բաքուն կարող են դեմ լինել Թեհրանի մասնակցությանը, ինչի համար էլ Զարիֆը զգուշացրել է թերևս, որ Իրանը չի հանդուրժի Թուրքիայի որևէ «բացառիկ» դեր, չի հանդուրժի դուրս մնալու որևէ հեռանկար:
Անկասկած է մի բան, որ պատերազմական գործողություններին զուգահեռ՝ ընթանում են գերակտիվ դիվանագիտական շարժեր, և Հայաստանի թե՛ քաղաքական ղեկավարությանը, թե՛ հանրությանը անհրաժեշտ է ռազմադաշտում վճռականությանը զուգահեռ նույնքան պատրաստված և համախմբված լինել քաղաքական դաշտում ծավալվող իրողություններին, ընդ որում՝ ունենալով ոչ միայն եղած քննարկվող թեմաների վերաբերյալ սեփական տակտիկական և ռազմավարական մոտեցումներ, այլ նաև սեփական գաղափարներ՝ տակտիկական ճկունության համար:
Հատկանշական է նաև, որ վերջին օրերին նկատելիորեն աշխուժանում է ԱՄՆ-ը: Ի դեպ, այդ իմաստով էլ հատկանշական է Իրանի հայտարարությունը Մինսկի խմբի համանախագահության «լրացման» մեխանիզմի մասին: