Ազգային-ժողովրդավարական բևեռի նախաձեռնող խումբը հանդես է եկել հայտարարությամբ, որտեղ նշվում է, որ անընդունելի են համարում տարածքներ խաղաղության դիմաց սկզբունքի կենսագործումը։
Ի՞նչ եք կարծում՝ ինչո՞ւ է Մոսկվան Հայաստանի համար օրհասական վիճակում աջակցելու փոխարեն հանդես գալիս ճնշող հայտարարություններով․ «Առաջին լրատվական»-ի հարցին Ազգային-ժողովրդավարական բևեռի նախաձեռնող խմբի անդամ Վարուժան Ավետիսյանը պատասխանեց․ «Գիտեք՝ Ռուսաստանի ավանդական ռազմավարությունը հայտնի է և, այսպես կոչված՝ Լավրովի պլանը դրա դրսևորումն է, անշուշտ։ Այստեղ միայն անուններն են փոխվում, սակայն մենք արդեն երեք տասնամյակ է դրա տիրույթում ենք։ Հիմա առաջացել է մի իրավիճակ, որ Ռուսաստանը հնարավորություն ունի գիտակցելու՝ իր ներուժն ու իր ավանդական քաղաքականությունները լավրովյան պլանների տեսքով այլևս միմյանց չեն համապատասխանում։ Այսինքն՝ Ռուսաստանն այլևս նախկինի նման չի կարող «բաժանիր, որ տիրես» քաղաքականություն վարել մեր տարածքում, չի կարող Արցախի հարցը լծակ սարքել ու երկու կողմին դրանով կառավարել, որովհետև ակնհայտ է, որ Ադրբեջանն անցել է Թուրքիայի ռազմավարական կառավարման տակ և հետզհետե խորանում է նրա նկատմամբ Թուրքիայի վերահսկողությունը։
Այսօր Ադրբեջանը կանգնած է սիրիացման առաջ, որն իրականանալի սպառնալիք է ստեղծում Ռուսաստանի համար։ Այսօր արդեն այդ իսլամիստական վարակի բազմաթիվ օջախներ կան Ռուսաստանում, որի ականատեսն ենք մենք այս վերջին օրերին։ Այս ամենը շատ կարճ ժամանակում կհանգեցնի Ռուսաստանի ներքին ապակայունացման և որպես պետության քայքայման։ Այդպիսի վտանգի առաջ կանգնած պետությունը, որը 100-ամյակների կայսրական փորձ ունի, պետք է ի վերջո հասկանա, որ մեծամտության վիճակներում ընդունած իր որոշումներն այլևս չեն կարող իրականացվել։ Պարզ պատճառով՝ այլևս Ռուսաստանն այդպիսի լծակներ չունի։ Ռուսաստանը պետք է հաշտվի այսօրվա իր տնտեսական, տեխնոլոգիական հետամնացության հանգամանքների հետ և, ըստ այդմ, ճիշտ որոշումներ կայացնի։ Միակ ճիշտ որոշումը, որ կարող է այսօր կայացնել Ռուսաստանը, դա իր ավանդական ռազմավարության վերանայումն է ու Հայաստանին զինելն է բոլոր միջոցներով։
Այդ ուղղությամբ ինչ-որ շարժեր կատարվում են, բայց բավարար չեն: Դեռևս ավանդական ռազմավարությունն է գործում, «լավրովյան պլանը» ներկայացնելը միգուցե Լավրովի շուրթերով որոշակի տակտիկական հնարք էր, գուցեև իրապես դեռևս մեծապետական իներցիայի մեջ են. դժվար է ասել: Կարող է և հիբրիդային տարբերակն էլ լինել՝ «մեկ էլ տեսար ստացվեց» սկզբունքով:
Շատ ողջունելի է, որ ՀՀ վարչապետը չընկրկեց ռուսական կողմի ճնշման առաջ և փաստորեն մերժեց, անընդունելի համարեց: Մենք սատարում ենք հայտնել այդ առումով: Ճիշտ է, որ պետք է պայքարենք, և համոզված ենք, որ վճռական մենակին, մինչև վերջ պայքարողին անպայման դաշնակիցներ գտնվում են»:
Մանրամասները՝ տեսանյութում
