Վարչապետն իր ուղերձում ամեն բան շատ բաց տեքստով ասաց, որ առաջարկվող լուծումը մեզ համար ընդունելի չէ։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արման Եղոյանը՝ անդրադառնալով Լավրովի հայտարարություններին և դրան հաջորդած ՀՀ վարչապետ Նիկոլ Փաշինյանի ուղերձին։
«Այսինքն 5 շրջանների վերադարձ կոմունիկացիաների դիմաց, ըստ էության ոչ մի բանի դիմաց, հետո էլի 2 շրջանի վերադարձ էլի ինչ-որ անորոշ կարգավիճակի դիմաց, դա ընդունելի չէ։ Դա է եղել այս երկու տարիների խոսակցությունը»,-ասաց նա։
Հարցին, թե արյդոք սա պատասխան էր Լավրովի հայտարարությունների՞ն, Եղոյանը պատասխանեց. «Դա ուղղակի ասվեց։ Դա ոչ թե պատասխան էր Լավրովին, այլ պատասխան էր առաջարկվող լուծմանը։ Այստեղ անձի հարց չէ։ Առաջարկվել է լուծում, որը Հայաստանի համար անընդունելի է, որովհետև այն չի բերելու խաղաղության։ 5 շրջան հանձնելը բերելու է նոր պատերազմի»։