Վարչապետն այսօր հանդես եկավ ուղերձով, կրկին խոսեց ծանր իրադրության մասին և նշեց, որ Ադրբեջանն ու Թուրքիան հենց այնպես իրենց նկրտումները չեն թողնելու և հեռանալու։
Ըստ ձեզ, որո՞նք էին վարչապետի ուղերձի կարևոր արձանագրումները․ «Առաջին լրատվական»-ի հարցին փաստաբան Արտաշես Խալաթյանը պատասխանեց․ «Ես կարծում եմ՝ վարչապետի ուղերձի կարևոր արձանագրումն այն է, որ, ըստ էության, միջազգային իրավակարգը փաստացի փլուզվել է՝ գոյություն չունի։ Այսօր որևէ իրավական կառուցակարգ գոյություն չունի, որը կարող է զսպել ադրբեջանաթուրքական տանդեմի այս վայրագությունները։ Դրանով է պայմանավորված, որ վարչապետը նշեց՝ մենք մեր հույսը պետք է դնենք միայն մեզ վրա։ Երկրորդ արձանագրումը թերևս այն է, որն այսօր կուլիսային մակարդակում է՝ չնայած Լավրովի հարցազրույցից հետո այն կուլիսներից դուրս եկավ, որ Հայաստանը գտնվում է ճնշման ներքո, որպեսզի հանձնի առնվազն հինգ տարածաշրջան և համաձայնություն տա խաղաղապահների մուտքին տարածաշրջան։ Դրա դիմաց չստանալով առարկայական ոչինչ․ միայն փխրուն խաղաղություն, որը, ինչպես երևաց նաև Մոսկվայում ընդունած հումանիտար զինադադարից, որևէ երաշխիք չկա, որ Ադրբեջանը և Թուրքիան կպահպանեն։ Փաստացի վարչապետն իր ուղերձում հստակ արձանագրեց, որ մենք նման լուծում չենք հանդուրժում և չենք հանդուրժելու։ Ելույթի հիմնական նպատակն այն էր, որ այդ մեսիջը հասցնի հանրությանը և միջազգային խաղացողներին»։
Մոսկվան հերթական անգամ ստուգե՞ց մեր դիմադրողականությունն ու վճռականությունը․ «Առաջին լրատվական»-ի հարցին վերլուծաբան Գոռ Մադոյանը պատասխանեց․ «Մոսկվան հիմա էլ է շարունակում ստուգել մեր դիմադրողականությունն ու վճռականությունը, մեր պետականությունը և պետական ինստիտուտների ուժն ու սկզբունքայնությունը։ Վարչապետի ուղերձում կարևոր էր նաև մյունխենյան գործարքի հիշատակումը, որտեղ թե՛ Խորհրդային միությունը, և թե՛ հետագայում Ռուսաստանը Արևմուտքին մեղադրում էին Չեխոսլովակիան վաճառելու համար։ Արևմուտքը կարծում էր, որ Չեխոսլովակիան, վաճառելով Հիտլերին, կստանան խաղաղություն, սակայն նրանք ստացան թե՛ պատերազմ, թե՛ խայտառակություն։ Այս դեպքում մեր աչքի առաջ է 1920 թվականը, երբ Հայաստանի տարածքի հաշվին Թուրքիան ու Ռուսաստանը փորձում էին որոշակի գործարքի գալ։ Առավոտյան նույն բանի մասին հենց խոսում էր Լավրովը, երբ մեզ առաջարկում էր առնվազն հինգ տարածքների զիջում՝ հանուն ոչնչի»։
Մանրամասները՝ տեսանյութում։