Ազատազրկման մեջ գտնվող, «Ռեալնի Ազերբայջան» թերթի գլխավոր խմբագիր Էյնուլա Ֆաթուլաեւը հայտարարել է, որ հոկտեմբերի 19-ին հացադուլ է սկսելու: Վերջինս նման քայլով իր դժգոհությունն է հայտնում իշխանություններից, որոնք անտեսում են Մարդու իրավուքնների եվրոպական դատարանի որոշումը, այն է՝ անհապաղ ազատ արձակել ազատազրկված լրագրողին:
Հիշեցնենք, որ օրեր առաջ, ՄԻԵԴ-ի Մեծ պալատը որոշում էր ընդունել ուժի մեջ թողնել ՄԻԵԴ-ի ապրիլի 22-ի որոշումը, որով Ադրբեջանի իշխանություններին կոչ էր արվում՝ Ֆաթուլաեւին անհապաղ ազատ արձակել, քանի որ ադրբեջանական դատարանների դատավճիռներն անհիմն էին համարվել: Հիշեցնենք նաեւ, որ դեռեւս 2007-ին, Խոջալուի դեպքերի վերաբերյալ, զրպարտություններ կատարելու մեղադրանքով, վերջինս Յասամալի շրջանային դատարանի կողմից դատապարտվել էր 2.5 տարվա ազատազրկման: Սակայն հետագայում իշխանությունները դրանով չէին սահամանփակվել եւ եւս մեկ շինծու մեղադրանքի հիման վրա դատապարտել 8.5 տարվա ազատազրկման: 2010 թվականի ապրիլի 22-ին, Մարդու իրավունքների եվրոպական դատարանը որոշում ընդունեց, որի համաձայն՝ ադրբեջանական դատարանների գործողությունները համարվեցին անօրինական: Ինչից հետո, դատարանը լրագրողին անհապաղ ազատ արձակելու կոչ արեց: Սակայն ադրբեջանական իշխանությունները, հաշվի չառնելով Մարդու իրավունքների եվրոպական դատարանի որոշումը, ինչպես նաև մի շարք երկրների, միջազգային կառույցների եւ իրավապաշտպան կազմակերպությունների հորդորները, հակառակ քայլերի գնացին: Իսկ սրանից գրեթե կես տարի առաջ, 2009թ. դեկտեմբերի 29-ին, խցում, որտեղ պահվում էր «Ռեալնի Ազերբայջան» թերթի գլխավոր խմբագիրը՝ Էյնուլա ֆաթուլաեւը, ստուգումներ իրականացվեցին, ինչի արդյունքում Ֆաթուլաեւի կոշիկի եւ հագուստի մեջ թմրանյութեր «հայտնաբերվեցին»:
Մի շարք իրավապաշտպան կազմակերպություններ հանդես եկան հայտարարությամբ, որում մասնավորապես նշվում էր, թե Ֆաթուլաեւի նկատմամբ շինծու գործ է հարուցվել, որով իշխանությունները ցանկանում են կրկին երկարացնել Ֆաթուլաեւին ազատազրկման վայրում պահելու ժամկետը: Սեպտեմբերին Ադրբեջանի եւ ԱՄՆ նախագահներ Իլհամ Ալիևի ու Բարաք Օբամայի հանդիպման ժամանակ եւս ԱՄՆ նախագահը, խոսելով Ադրբեջանում ժողովրդավարական բարեփոխումների անհրաժեշտության մասին, Ադրբեջանի նախագահին լրագրողին ազատ արձակելու կոչ է արել: