Միջազգային հարաբերությունների և անվտանգության փորձագետ Սոսի Թաթիկյանը ֆեյսբուքյան իր էջում գրել է․
Վարչապետի ելույթը հաստատեց այն, ինչ մտածում եմ վերջին տաս օրը:
Ամեն կերպ պետք է հասնել այն բանին, որ ԵԱՀԿ Մինսկի խմբի երեք համանախագահները նախաձեռնեն ՄԱԿ-ի Անվտանգության խորհրդի նոր բանաձև, որը արձանագրի.
– Թուրքիայի անմիջական աջակցությամբ և ջիհադիստ ահաբեկիչների ներմուծմամբ` Ադրբեջանի կողմից Արցախի ու Հայաստանի հանդեպ սանձազերծված ագրեսիան, միջազգային իրավունքի և հումանիտար իրավունքի խախտումները, քաղաքացիական բնակչության և ենթակառուցվածքների թիրախավորումը, արգելված զինատեսակների օգտագործումը;
– Սահմանեն Ադրբեջանին զենքի ու ռազմական տեխնոլոգիաների փոխանցման էմբարգո և Ադրբեջանի ու Թուրքիայի հանդեպ այլ սանկցիաներ;
– ՆԱՏՕ-ին կոչ անեն օգտագործել իր անդամ Թուրքիայի հանդեպ ազդեցությունը` նրա ուղղակի ռազմական մասնակցությունը Ադրբեջանի կողմից ռազմական ագրեսիայում դադարեցնելու նպատակով;
– Արձանագրեն Արցախի բնակչության` էթնիկ բնաջնջման վտանգը ու նրա ինքնորոշման իրավունքը;
– Հիմնադրեն զինադադարի մոնիտորինգի ՌԴ-ԵՄ-ԱՄՆ առաքելություն;
– Հիմնադրեն ՄԱԿ-ի հումանիտար գործակալությունների առաքելություններ` հենց որ անվտանգության մինիմում պայմանները դա թույլ տան, Արցախի հումանիտար աղետը հաղթահարելու նպատակով:
Ես հասկանում եմ, որ այս ամենին հասնելը շատ դժվար է, սակայն չեմ հասկանում, թե ինչպես կարող է այսպիսի իրավիճակում ՄԱԿ ԱԽ-ը բանաձև չընդունի:
Եթե ԵԱՀԿ Մինսկի խմբի համանախագահները նախաձեռնեն այդպիսի բանաձև, ապա ԱԽ-ի ներկայիս կազմը բարենպաստ է ու կարծում եմ կընդունվի:
