Արցախյան ազատամարտի (որը ես անկախության պատերազմ եմ անվանում) աշխարհաքաղաքական ճառագայթումները տարածվում են: Ակնկալվում էր, որ եթե մեզ մոտ ճգնաժամը խորանա, ահաբեկիչները տեղափոխվելու են Հյուսիսային Կովկաս: Այս մասին «Առաջին լրատվական»-ի հետ զրույցում ասաց քաղաքագետ Լևոն Շիրինյանը՝ անդրադառնալով դիտարկմանը, որ այսօր Դաղստանում ահաբեկիչներ են բացահայտվել և չեզոքացվել:
«Թուրքիայի համար Հյուսիսային Կովկասը պարարտ հող է՝ այնտեղ նա տասնամյակներ շարունակ կիրառել է փափուկ ուժ կոչվածը՝ բացել է դպրոցներ, մշակույթի կենտրոններ և ապրանքների էժան հոսք է կազմակերպել: Այսինքն՝ Հյուսիսային Կովկասն այսօր պայթյունավտանգ է՝ ռեալ իմաստով: Ռուսաստանը դանդաղում է: Եթե Ռուսաստանը Հայաստանի հետ գործընկերային հարաբերությունները դարձնի միջպետական, ոչ թե թողնի կլանային հարաբերությունների մակարդակի, կարծում եմ՝ արդյունավետ կպայքարենք: Բայց իրենք մինչև այդ ցավը չզգան, չեն անելու: Մեկ ճանապարհ կա՝ Ռուսաստանը պետք է մոռանա Հայաստան խաղաղապահներ բերելու մասին և պետք է հայկական բանակը մինչև ատամները զինի՝ հանուն իրենց»,- նշեց քաղաքագետը՝ հավելելով նաև, որ ոչ ոք չի կարող ապացուցել, որ Դաղստան հասած ահաբեկիչները թուրքական հետախուզության ծառայությունից չեն:
Անդրադառնալով Թուրքիայի ստրատեգիային, Շիրինյանն ընդգծեց, որ հարավային ուղղությամբ գրոհի նպատակը Մեղրիի միջանցքով, Արաքսի հովտով դեպի Նախիջևան շարժվելն է:
Մանրամասն՝ տեսանյութում: