«Ժառանգություն» խմբակցության պատգամավոր Լարիսա Ալավերդյանը մեզ հետ զրույցում հայտնեց, որ իրենց կուսակցությունն ի վիճակի է նույնիսկ կարճ ժամանակահատվածում մոբիլիզացնել ուժերը և պատրաստվել արտահերթ խորհրդարանական ընտրությունների, եթե դրանց անցկացման մասին որոշում ընդունվի ՀԱԿ-իշխանություն երկխոսության արդյունքում։
««Ժառանգությունը» ունի յուրահատուկ ընտրազանգված։ Մեր ընտրազանգվածի առանձնահատկությունն այն է, որ դա միտինգավոր չէ, գաղափարներով է շարժվում ընտրությունների ժամանակ և չի զբաղվում ամենօրյա ակտիվությամբ քաղաքական դաշտում»,- ասաց Լարիսա Ալավերդյանը։
Ըստ պատգամավորի՝ ընտրությունների ժամանակ «Ժառանգությանը» ձայն կտան նաև այն մարդիկ, ում կողքին է կանգնել «Ժառանգությունը»։
Լարիսա Ալավերդյանը նույն վստահությունը, որ ունի իրենց ընտրազանգվածի հանդեպ, չի արտահայտում Կենտրոնական ընտրական հանձնաժողովի հանդեպ։ Ըստ նրա՝ հանձնաժողովից հիասթափված են ոչ միայն «Ժառանգությունը», այլև այլ կուսակցություններ ու սովորական ընտրողներ։
Ըստ Ալավերդյանի՝ հասարակությունը տրամադրված չի ընտրություններին, հոգեպես հիասթափված է ու չի վստահում, որ իր ձայնը տեղ է հասնելու։
