Վարչապետ Նիկոլ Փաշինյանը հանդիպել է խորհրդարանական և արտախորհրդարանական քաղաքական ուժերի ներկայացուցիչների հետ. օրակարգում Լեռնային Ղարաբաղի հարցն էր: Ինչո՞ւ հիմա: Թեմայի շուրջ «Առաջին լրատվական»-ի հետ զրույցում, անդրադառնալով այս հարցին, քաղաքագետ Էդգար Վարդանյանը նշեց. «Կա որոշակի փաստաթուղթ, ձեռք է բերվել պայմանավորվածություն, որն առնչվում է հենց այսօրվա պատերազմական իրավիճակին: Այդ փաստաթուղթը գերկարևոր փաստաթուղթ է՝ անկախ նրանից, թե հիմա որքանով է կյանքի կոչվել: Տեսնում ենք, որ Ադրբեջանն անընդհատ խախտում է հրադադարի ռեժիմը, և սա արհամարհանք է միջնորդների, հատկապես Ռուսաստանի նկատմամբ: Սա նաև Ադրբեջանի կողմից ուղերձ է, որ հեշտ չեն համաձյանվելու, որ դեռ շատ բան ստանալու ակնկալիք ունեն:
Քանի որ իշխանությունը թափանցիկ գործելաոճ է որդեգրել և քանի որ այսպիսի հանգրավնի ենք հասել, հավանաբար Փաշինյանը և իր թիմը սկսել են կոնսուլտացիաներ տարբեր շերտերի հետ: Չի բացառվում, որ կոնսուլտացիաներ լինեն նաև ՀԿ-ների հետ, ակտիվ աշխատանք է իրականացվում նաև դեսպանների հետ: Ըստ էության՝ կառավարող ուժը ներկայացնում է իր դիրքորոշումը և լսում է բոլորի տեսակետները ստեղծված իրավիճակի, պատերազմի, հրադադարի վերաբերյալ: Նախատեսվում է, որ վարչապետը կխոսի նաև հանրության հետ»:
Վերլուծաբան Արեգ Քոչինյանի դիտարկմամբ՝ այս հանդիպումները կազմակերպվում են ներառականություն ապահովելու համար՝ստեղծելու մթնոլորտ, որ բոլորն իրենց հասկացված զգան: «Իմ կարծիքով՝ սա վատ է և ժամավաճառություն է: Ռազմական դրությունը և պատերազմը քննարկման միջավայր չէ, դա հրամանի և հրամանի կատարման և որոշումների կատարման համար պատասխանատվության միջավայր է: Պետք է համազգային կոնսենսուս, որ մեր նպատակը հաղթանակն է, և այդ նպատակից ցանկացած շեղվողի հարցով պետք է զբաղվեն իրավապահ մարմինները: Պետք է լրջանալ և հասկանալ,որ կենաց մահու պատերազմի մեջ ենք»,- նշեց վերլուծաբանը:
Մանրամասները՝ տեսանյութում: