«Միջազգային հանրության լուրջ խաղացողների կողմից պետք է Արցախի ճանաչում լինի։ Այստեղ շատ կարևոր է հասկանալ, որ այդ ճանաչումը միակ տարբերակն է Արցախի ժողովրդի անվտանգությունն ապահովելու համար՝ քաղաքական իմաստով։ Իսկ ռազմական իմաստով՝ Արցախի Պաշտպանության բանակի գործառույթն է»,-«Առաջին լրատվական»-ի հետ զրույցում նման տեսակետ հայտնեց Ազգային ժողովի արտաքին հարաբերությունների մշտական հանձնաժողովի անդամ, «Իմ քայլը» խմբակցության պատգամավոր Սոս Ավետիսյանը։
Նրա դիտարկմամբ՝ շատ կարևոր է, որ ոչ միայն երկրները, այլ մարդկությունը ճանաչեն Արցախի ինքնորոշման իրավունքը. «Եվ այն տրամաբանությամբ, որ սա փրկության ու հայերի անվտանգությունն ապահովող մեխանիզմ է»։
Ի՞նչն է այդ երկրներին հետ պահում, հարցին ի պատասխան, Սոս Ավետիսյանն ասաց. «Չենք կարող ասել՝ հե՞տ է պահում, թե՞ ոչ։ Բայց կան որոշակի հաշվարկներ ԵԱՀԿ Մինսկի խմբի ֆորմատի պահպանման իմաստով, ինչը ևս շատ կարևոր է։ Այդտեղ էլ որոշակի տարընկալումներ են լինում՝ բանակցություննե՞ր, թե՞ ճանաչում։ Բայց ես կարծում եմ, որ ճանաչումը բանակցություններին չի խանգարում»։
Հարցազրույցն ամբողջությամբ՝ տեսանյութում։